ಬೆಂಗಳೂರು: ಮಹಿಳಾ ಪೊಲೀಸ್ ಪೇದೆ ಸೇರಿದಂತೆ ಇಬ್ಬರು ಕರ್ತವ್ಯನಿರತ ಪೊಲೀಸರ ಮೇಲೆ ವಕೀಲರ ಗುಂಪೊಂದು ಹಲ್ಲೆ ನಡೆಸಿರುವ ಘಟನೆ ನಗರದ ಮ್ಯಾಜಿಸ್ಟ್ರೇಟ್ ಕೋರ್ಟ್ ಆವರಣದಲ್ಲಿ ಮಂಗಳವಾರ ನಡೆದಿದೆ.
ಹಲಸೂರು ಗೇಟ್ ಮಹಿಳಾ ಪೊಲೀಸ್  ಠಾಣೆಯ ಬಸವರಾಜು ಮತ್ತು ರೂಪಾ ಎಂಬವರು ಹಲ್ಲೆಗೊಳಗಾಗಿದ್ದು, ಈ ಪೈಕಿ ಬಸವರಾಜು ಅವರು ತೀವ್ರವಾಗಿ ಗಾಯಗೊಂಡಿದ್ದಾರೆಂದು ಹೇಳಲಾಗಿದ್ದು, ಅವರಿಬ್ಬರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಬಸವರಾಜು ಅವರ ಮೂಗು ಒಡೆದು ರಕ್ತ ಒಸರಿದ್ದು, ಕೈ ಮತ್ತು ಕಾಲುಗಳ ಮೇಲೆಯೂ ಹಲ್ಲೆಗಳಾಗಿವೆ ಎಂದು ತಿಳಿದು ಬಂದಿದೆ.
ಆರೋಪಿಯೊಬ್ಬನನ್ನು ವಾಹನದಲ್ಲಿ ನ್ಯಾಯಾಲಯಕ್ಕೆ ಹಾಜರುಪಡಿಸಲು ಬರುತ್ತಿದ್ದಾಗ, ಆವರಣದಲ್ಲಿದ್ದ ೨೦ರಿಂದ ೨೫ ವಕೀಲರ ಗುಂಪು ಪೊಲೀಸರ ವಿರುದ್ಧ ಘೋಷಣೆ ಕೂಗುತ್ತ, ಏಕಾಏಕಿ ಹಲ್ಲೆ ಮಾಡಲು ಶುರುಮಾಡಿದರು ಎಂದು ಮಾಧ್ಯಮಕ್ಕೆ ಬಸವರಾಜು ತಿಳಿಸಿದ್ದಾರೆ.
ಮಾ. ೨ರಂದು ಸಿಟಿ ಸಿವಿಲ್ ಕೋರ್ಟ್ ಅವರಣದಲ್ಲಿ ನಡೆದ ಹಲ್ಲೆಗೆ ಪ್ರತೀಕಾರವಾಗಿ ವಕೀಲರು ಪೊಲೀಸರ ಮೇಲೆ ಹಲ್ಲೆ ಮಾಡಿದ್ದಾರೆ ಎನ್ನಲಾಗಿದೆ. ಪತ್ರಕರ್ತರ ಮೇಲೆ ಹಲ್ಲೆ ನಡೆದ ಸಂದರ್ಭದಲ್ಲಿ ಇದೇ ಬಸವರಾಜು ವಕೀಲರ ಮೇಲೆ ಹಲ್ಲೆ ಮಾಡಿದ್ದರು ಎಂದು ವಕೀಲರು ಆರೋಪಿಸಿದ್ದಾರೆ.
ಇದ್ದಕ್ಕಿದ್ದಂತೆ ದಾಳಿ ಮಾಡಿ ಬಸವರಾಜು ಮೇಲೆ ಹಲ್ಲೆ ಮಾಡಿದ್ದಾರೆ. ಅವರು ಕೆಳಗೆ ಬಿದ್ದರೂ ಅವರನ್ನು ಬಿಟ್ಟಿಲ್ಲ. ಅವರ ಅಂಗಿಯನ್ನು ಕಿತ್ತುಹಾಕಿ ಬೂಟುಗಾಲಿನಿಂದ ಬಸವರಾಜು ಅವರನ್ನು ವಕೀಲರು ಒದ್ದಿದ್ದಾರೆ. ಸಹೋದ್ಯೋಗಿಯ ಮೇಲೆ ಹಲ್ಲೆಯಾಗುವುದನ್ನು ತಪ್ಪಿಸಲು ಹೋದ ರೂಪಾ ಮೇಲೆ ಕೂಡ ಕೆಲ ವಕೀಲರು ಕೈ ಮಾಡಿದ್ದಾರೆ.
ಮಾ. ೨ರ ಹಲ್ಲೆಗೆ ಸಂಬಂಧಿಸಿ ಮಾಧ್ಯಮ ಮತ್ತು ವಕೀಲರ ನಡುವೆ ನಡೆಯುತ್ತಿರುವ ಸಂಧಾನ ಪ್ರಕ್ರಿಯೆ ಇನ್ನೂ ಜಾರಿಯಲ್ಲಿರುವಾಗಲೇ ಮತ್ತೆ ಹಲ್ಲೆ ನಡೆದಿದೆ. ಹಾಗೆಯೆ, ವಕೀಲರನ್ನು ಮಾಧ್ಯಮಗಳಲ್ಲಿ ಗೂಂಡಾಗಳು, ತಾಲಿಬಾನಿಗಳು, ರೌಡಿಗಳು ಎಂದು ಸಂಬೋಧಿಸಬಾರದು ಎಂದು ನ್ಯಾಯಾಲಯ ಆಜ್ಞೆ ಜಾರಿ ಮಾಡಿದೆ. ಕೆಲ ದಿನಗಳ ಹಿಂದೆ, ಪೊಲೀಸರ ಕುಟುಂಬದ ಸದಸ್ಯರು ಒಂದು ದಿನದ ಸತ್ಯಾಗ್ರಹ ಮಾಡಿ, ಪೊಲೀಸರನ್ನು ವಕೀಲರಿಂದ ರಕ್ಷಿಸಬೇಕೆಂದು ಆಗ್ರಹಿಸಿದ್ದನ್ನು ಇಲ್ಲಿ ನೆನಪಿಸಬಹುದು.

ಬೆಂಗಳೂರು: ಮತ್ತೆ ಅಧಿಕಾರ ಪಡೆಯಲು ಯಡಿಯೂರಪ್ಪ ರಾಜ್ಯಾ ದ್ಯಂತ ಪ್ರವಾಸ ಕೈಗೊಂಡು ಏಪ್ರಿಲ್ ನಲ್ಲಿ ಸಿಹಿ ಸುದ್ದಿ ದೊರೆಯಲಿದೆ ಎಂಬ ವಿಶ್ವಾಸ ವ್ಯಕ್ತಪಡಿಸಿರುವ ಬೆನ್ನೆಲ್ಲೆ ಅವರ ಬೆಂಬಲಿಗ ಹಾಗೂ ತುಮಕೂರು ಗ್ರಾಮಾಂತರ ವಿಧಾನಸಭಾ ಕ್ಷೇತ್ರ ಪ್ರತಿನಿ ಧಿಸುವ ಸುರೇಶ್‌ಗೌಡ, ಮುಖ್ಯಮಂತ್ರಿ ಸದಾನಂದಗೌಡರ ಜೊತೆ ಜಟಾಪಟಿ ನಡೆಸಿ, ನಿಮ್ಮನ್ನು ಅಧಿಕಾರದಿಂದ ಕೆಳಗಿಳಿಸುವುದಾಗಿ ಎಚ್ಚರಿಕೆ ನೀಡಿದ ಘಟನೆ ಜರುಗಿದೆ.
ವರ್ಗಾವಣೆಗೆ ಸಂಬಂಧಿಸಿದಂತೆ ವಿಧಾನಸೌಧದ ಕೊಠಡಿಯಲ್ಲಿ ಮೊನ್ನೆ ಸಂಜೆ ಮುಖ್ಯಮಂತ್ರಿಯವರನ್ನು ಭೇಟಿ ಮಾಡಿದ ಸುರೇಶ್‌ಗೌಡ ಅವರ ಮನವಿಗೆ ಮುಖ್ಯಮಂತ್ರಿ ಸ್ಪಂದಿಸದ ಹಿನ್ನೆಲೆಯಲ್ಲಿ ಈ ಜಟಾಪಟಿ ನಡೆದಿದೆ. ಮುಖ್ಯಮಂತ್ರಿಯವರ ಅ ಸಹಕಾರದಿಂದ ಕೆರಳಿದ ಸುರೇಶ್ ಗೌಡ, ಇದೇನೂ ದೊಡ್ಡ ಕೆಲಸವಲ್ಲ, ಇಷ್ಟು ಸಣ್ಣ ಕೆಲಸವನ್ನೂ ಮಾಡಿಕೊಡುವುದಿಲ್ಲ ಎಂದರೆ ಹೇಗೆ ಎಂದು ಪ್ರಶ್ನೆ ಮಾಡಿದರು. ಸುರೇಶ್‌ಗೌಡರ ಮಾತಿಗೆ ಕ್ಯಾರೇ ಎನ್ನದ ಮುಖ್ಯಮಂತ್ರಿ ಕೆಲಸ ಮಾಡಿಕೊಡಲು ಸಾಧ್ಯವಿಲ್ಲ ಎಂದರೆ ಸಾಧ್ಯವಿಲ್ಲ ಅಷ್ಟೇ. ಇದಕ್ಕಾಗಿ ಪದೇ ಪದೇ ತಲೆ ತಿನ್ನಬೇಡಿ ಎಂದಿದ್ದಾರೆ.
ಮುಖ್ಯಮಂತ್ರಿಯವರ ಮಾತಿನಿಂದ ಕೆರಳಿದ ಸುರೇಶ್‌ಗೌಡ,ರೀ ನೀವು ಸಿಎಂ ಆಗಿದ್ದೇ ನಮ್ಮಿಂದ. ಇಷ್ಟಿದ್ದರೂ ನಮಗೇ ಉಲ್ಟಾ ಹೊಡೆಯುತ್ತೀರಾ ನಾನೇನು ಮಾಡಲು ಸಾಧ್ಯವಾಗದ ಕೆಲಸ ಹೇಳಿದೆನಾ ಉದ್ದೇಶಪೂರ್ವಕವಾಗಿಯೇ ನೀವು ನಮ್ಮನ್ನು ನಿರ್ಲಕ್ಷಿಸುವ ಕೆಲಸ ಮಾಡುತ್ತಿದ್ದೀರಾ ಎಂದು ಜರಿದರು. ಮುಂದುವರಿದು ಮಾತನಾಡಿ, ನಿಮ್ಮನ್ನು ಮುಖ್ಯಮಂತ್ರಿ ಮಾಡಿ ನಾವು ತಪ್ಪು ಮಾಡಿದ್ದೇವೆ ನಿಜ. ಆದರೆ ನೀವು ಅದೆಷ್ಟು ದಿನ ಈ ಹುದ್ದೆಯಲ್ಲಿರುತ್ತೀರೋ ನಾನೂ ನೋಡುತ್ತೇನೆ ಎಂದು ಕಿಡಿಕಾರಿದ್ದಾರೆ. ಸುರೇಶ್‌ಗೌಡರ ಮಾತಿನಿಂದ ಅಪ್ರತಿಭರಾದ ಸದಾನಂದ ಗೌಡ, ನೀವು ಈ ರೀತಿ ಎಲ್ಲ ಮಾತನಾಡುವುದು ಸರಿಯಲ್ಲ. ಆಗುವ ಕೆಲಸವಾದರೆ ಮಾಡಿ ಕೊಡುತ್ತೇನೆ. ಆಗುವುದಿಲ್ಲ ಎಂದರೆ ಆಗುವುದಿಲ್ಲ ಎನ್ನುತ್ತೇನೆ. ಅದಕ್ಕಾಗಿ ನೀವು ಇಷ್ಟು ಮಾತನಾಡುವುದು ಸರಿಯಲ್ಲ ಎಂದು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ಆದರೆ ಮುಖ್ಯಮಂತ್ರಿಯವರ ಮಾತಿನಿಂದ ಇನ್ನಷ್ಟು ಕೆರಳಿದ ಸುರೇಶ್‌ಗೌಡ, ನಿಮ್ಮನ್ನು ಹುದ್ದೆಯಿಂದ ಕೆಳಗಿಳಿಸಲು ನಾನು ಯಾವ ತ್ಯಾಗಕ್ಕಾದರೂ ಸಿದ್ಧ. ಬೇಕಿದ್ದರೆ ಈ ಶಾಸಕ ಸ್ಥಾನಕ್ಕೇ ರಾಜೀನಾಮೆ ಕೊಟ್ಟು ಹೋಗುತ್ತೇನೆ. ಆದರೆ ನೀವು  ಮುಖ್ಯಮಂತ್ರಿ ಹುದ್ದೆಯಲ್ಲಿ ಎಷ್ಟು ದಿನ ಇರುತ್ತೀರೋ ನಾನೂ ನೋಡುತ್ತೇನೆ ಎಂದು ಬೆದರಿಕೆ ಒಡ್ಡಿದ್ದಾರೆ.
ವಕ್ಫ್ ಆಸ್ತಿ ಕಬಳಿಕೆ: ಸದನದಲ್ಲಿ ಕೋಲಾಹಲ
ಬೆಂಗಳೂರು: ವಕ್ಫ್ ಮಂಡಳಿಗೆ ಸೇರಿದ ೨ ಲಕ್ಷ ಕೋಟಿ ರೂ. ಆಸ್ತಿ ಕಬಳಿಕೆ ವಿಚಾರ ವಿಧಾನಸಭೆಯಲ್ಲಿ ಪ್ರತಿಧ್ವನಿಸಿ  ಬಾರೀ ಕೋಲಾಹಲ, ಧರಣಿಗೆ ಎಡೆಮಾಡಿಕೊಟ್ಟಿತು.
ಶೂನ್ಯ ವೇಳೆಯಲ್ಲಿ ವಿಚಾರ ಪ್ರಸ್ತಾಪಿಸಿದ ಬಿಜೆಪಿಯ ಸಿ.ಟಿ. ರವಿ. ಅಲ್ಪಸಂಖ್ಯಾತರ ಆಯೋಗದ ಅಧ್ಯಕ್ಷರು ವಕ್ಫ್ ಮಂಡಳಿಯ ಆಸ್ತಿ ಕಬಳಿಕೆ ಬಗ್ಗೆ ತನಿಖಾ ವರದಿ ಸಲ್ಲಿಸಿದ್ದಾರೆ. ಈ ಬಗ್ಗೆ ತನಿಖೆಯಾಗಬೇಕು. ತಪ್ಪಿತಸ್ಥರಿಗೆ ಶಿಕ್ಷೆಯಾಗಲಿ ಎಂದು ಆಗ್ರಹಿಸಿದರು. ವರದಿ ಗಮನಿಸಿದರೆ ಆತಂಕ ಉಂಟಾ ಗುತ್ತದೆ. ಬೇಲಿಯೇ ಎದ್ದು ಹೊಲ ಮೇಯ್ದಂತೆ ಆಗಿದೆ.  ವರದಿಯನ್ನು ಮಂಡಿಸಿ ಎಲ್ಲರ ಮೇಲೂ ಕ್ರಮಕ್ಕೆಗೂಳ್ಳಲಾಗುವುದು ಎಂದರು. ಈ ಹಂತದಲ್ಲಿ ಜೆಡಿಎಸ್ ರೇವಣ್ಣ, ಜಮೀರ್ ಅಹಮದ್ ಮತ್ತಿತರರು ಎದ್ದು ನಿಂತ ವರದಿಯ ಮಂಡನೆಯಾಗಬೇಕು. ತಪ್ಪಿತಸ್ಥರ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಒತ್ತಡ ಹೇರಿದಾಗ ಸದನದಲ್ಲಿ ಸ್ವಲ್ಪ ಹೊತ್ತು ಗದ್ದಲದ ವಾತಾವರಣ ಉಂಟಾಯಿತು. ಗದ್ದಲದ ನಡುವೆ ಮಾತನಾಡಿದ ವಿರೋಧ ಪಕ್ಷದ ನಾಯಕ ಸಿದ್ದರಾಮಯ್ಯ ಮೊದಲು ವರದಿ ಮಂಡಿಸಲಿ ನಂತರ ಚರ್ಚೆ ಮಾಡೋಣ. ಉಪ್ಪು ತಿಂದಿರುವವರು ನೀರು ಕುಡಿಯುತ್ತಾರೆ ಎಂದು ಏರಿದ ಧ್ವನಿಯಲ್ಲಿ ಹೇಳಿದರು.
ಜೆಡಿಎಸ್‌ನ ಜಮೀರ್ ಅಹಮದ್, ಮಧ್ಯಮಗಳಲ್ಲಿ ಆಸ್ತಿ ನುಂಗಿದವರ ಪಟ್ಟಿಯಲ್ಲಿ ನನ್ನ ಹೆಸರೂ ಬಂದಿದೆ. ಇದರಿಂದ ತಮಗೆ ನೋವಾಗಿದೆ. ಕೂಡಲೇ ಯಾರು ಆಸ್ತಿ ಕಬಳಿಸಿದ್ದಾರೆ ಎಂಬುವರ ಹೆಸರನ್ನು ಬಹಿರಂಗಪಡಿಸಿ ತಪ್ಪಿತಸ್ಥರನ್ನು ಗಲ್ಲಿಗೆ ಹಾಕಿ. ಈ ಬಗ್ಗೆ ಸಿಬಿಐ ಇಲ್ಲವೆ ಲೋಕಾಯುಕ್ತ ತನಿಖೆ ಆಗಲಿ ಎಂದು ಒತ್ತಾಯಿಸಿದರು. ಕಾಂಗ್ರೆಸ್‌ನ ಕಮರ್‌ಉಲ್ಲಾ ಇಸ್ಲಾಂ, ಟಿ.ಬಿ. ಜಯಚಂದ್ರ ತನ್ವೀರ್‌ಸೇಠ್ ಇವರುಗಳು ಸಹ ವರದಿ ಮಂಡನೆಯಾಗಬೇಕೆಂದು ಒತ್ತಾಯಿಸಿದರು. ಈ ವಿಚಾರ ಪ್ರಸ್ತಾಪವಾಗುತ್ತಿದ್ದಂತೆ ಸದನದಲ್ಲಿ ಕಾವೇರಿದ ವಾತಾವರಣ ಉಂಟಾಯಿತು. ವಕ್ಫ್ ಆಸ್ತಿ ಕಬಳಿಕೆ ಆಗಿದೆ ಎಂದು ಅಲ್ಪಸಂಖ್ಯಾತರ ಆಯೋಗದ ಅಧ್ಯಕ್ಷರು ನೀಡಿರುವ ವರದಿಯನ್ನು ವಿಧಾನಸಭೆಯಲ್ಲಿ ಮಂಡಿಸಬೇಕು. ಈ ಬಗ್ಗೆ ಸಮಗ್ರವಾಗಿ ಚರ್ಚಿಸಿ ಅಗತ್ಯವೆನಿಸಿದರೆ ಸಿಬಿಐ ತನಿಖೆಗೆ ಒಪ್ಪಿಸಬೇಕು ಎಂದು ವಿಪಕ್ಷ ನಾಯಕ ಸಿದ್ದರಾಮಯ್ಯ ವಿಧಾನಸಭೆಯಲ್ಲಿ ಒತ್ತಾಯಿಸಿದರು.
ವರದಿಯನ್ನು ಮೊದಲು ಸದನದಲ್ಲಿ ಮಂಡಿಸಬೇಕು. ಆ ವರದಿಯಲ್ಲಿ ಏನಿದೆ. ಯಾರ‍್ಯಾರು ಆಸ್ತಿಯನ್ನು ಒತ್ತುವರಿ ಮಾಡಿಕೊಂಡಿದ್ದಾರೆ, ಕಬಳಿಸಿದ್ದಾರೆ, ಎಂಬುದರ ಬಗ್ಗೆ ಚರ್ಚೆಯಾಗಬೇಕು. ಆರೋಪಗಳು ಸಾಬೀತಾಗುವಂತಹ ಅಂಶಗಳಿದ್ದರೆ ಸಿಬಿಐ ತನಿಖೆಗೆ ವಹಿಸಬಹುದು ಎಂದು ಅವರು ಒತ್ತಾಯಿಸಿದರು.
ಇದಕ್ಕೂ ಮುನ್ನ ಮಾತನಾಡಿದ ಶಾಸಕರಾದ ಟಿ.ಬಿ. ಜಯಚಂದ್ರ, ತನ್ವೀರ್‌ಸೇಠ್, ಹ್ಯಾರೀಸ್, ತಪ್ಪಿತಸ್ಥರು ಯಾರೇ ಇರಲಿ ಶಿಕ್ಷೆಯಾಗಬೇಕು. ಈ ಬಗ್ಗೆ ಸೂಕ್ತ ತನಿಖೆ ನಡೆಸಿ ನಮ್ಮ ಸಹಕಾರ ಇರುತ್ತದೆ ಎಂದರು. ಶಾಸಕ ಸೈಯದ್ ಯಾಸೀನ್ ನಮ್ಮ ಸಮುದಾಯದ ದೊಡ್ಡ ನಾಯಕರುಗಳ ಹೆಸರನ್ನು ವರದಿಯಲ್ಲಿ ಸೇರಿಸಲಾಗಿದೆ. ಈ ವರದಿ ಸುಳ್ಳಿನ ಕಂತೆಯಾಗಿದೆ ಎಂದರು.

ಮಂಗಳೂರು: ಹಣವನ್ನು ದ್ವಿಗುಣ ಗೊಳಿಸುವುದಾಗಿ ಜನರಿಗೆ ಕೋಟ್ಯಂ ತರ ರೂ. ವಂಚಿಸಿದ್ದ ಪ್ರಕರಣಕ್ಕೆ ಸಂಬಂಧಿಸಿ ಆರೋಪಿಗಳ ಪರ ನಿಂತಿ ರುವ ಕದ್ರಿ ಎಸ್.ಐ. ಅವರು ಈ ಕುರಿತು ದಾಖಲಾಗಿದ್ದ ಆರು ವಂಚನೆ ಪ್ರಕರಣಗಳನ್ನು ಸುಳ್ಳು ಎಂದು ಕೋರ್ಟ್‌ಗೆ ವರದಿ ಸಲ್ಲಿಸಿದ ಘಟನೆ ಬೆಳಕಿಗೆ ಬಂದಿದೆ. ಗ್ಲೋಬಲ್ ಇಂಡೆಕ್ಸ್ ಎಂಬ ಸಂಸ್ಥೆ ಜಿಲ್ಲೆಯ ಜನರಿಗೆ ಅಂದಾಜು ೫೦ ಕೋಟಿಗೂ ಅಧಿಕ ವಂಚಿಸಿದ್ದು, ವಂಚನೆಗೊಳಗಾದವರಲ್ಲಿ ಬಡ-ಮಧ್ಯಮ ವರ್ಗದ ಜನರು, ಪೊಲೀಸರೂ ಸೇರಿದ್ದರು. ಕೇವಲ ಒಂದೇ ವರ್ಷದಲ್ಲಿ ಹಣವನ್ನು ದ್ವಿಗುಣ ಮಾಡಿಕೊಡುವುದಾಗಿ ಹೇಳಿದ್ದರಿಂದ ನೂರಾರು ಮಂದಿ ಗ್ಲೋಬಲ್ ಇಂಡೆಕ್ಸ್‌ಗೆ ಸೇರಿದ್ದರು.
ಕರಂಗಲ್ಪಾಡಿಯ ಮಹೇಂದ್ರ ಆರ್ಕೇಡ್‌ನಲ್ಲಿ ಸಂಸ್ಥೆ ಕಾರ್ಯಾಚರಿಸುತ್ತಿದ್ದ ಬಗ್ಗೆ ‘ಜಯಕಿರಣ ಪತ್ರಿಕೆ ವಿಸ್ತೃತ ವರದಿ ಪ್ರಕಟಿಸಿತ್ತು. ಸಂಸ್ಥೆ ವಿರುದ್ಧ ೨೦೧೧ರ ಮಾರ್ಚ್‌ನಲ್ಲಿ ಒಟ್ಟು ೧೦ ವಂಚನೆ ಪ್ರಕರಣಗಳು ದಾಖಲಾಗಿದ್ದು, ಅದರಲ್ಲಿ ನಾಲ್ಕು ಪ್ರಕರಣಗಳಲ್ಲಿ ಚಾರ್ಜ್‌ಶೀಟ್ ಹಾಕಲಾಗಿತ್ತು. ಇದೀಗ ಈ ಕುರಿತು ದಾಖಲಾಗಿರುವ ಆರು ಪ್ರಕರಣಗಳು ಸುಳ್ಳು ಎಂದು ಕದ್ರಿ ಇನ್ಸ್‌ಪೆಕ್ಟರ್ ಬಿ ರಿಪೋರ್ಟ್ ಸಲ್ಲಿಸಿದ್ದು ಬಯಲಾಗಿದೆ. ಇದೀಗ ಕದ್ರಿ ಠಾಣಾ ಎಸ್.ಐ. ಕಾಂಡೋಂ ರೈಡ್ ಪ್ರಕರಣದಲ್ಲಿ ಅಮಾನತಾಗಿದ್ದು, ಅವರ ಮತ್ತೊಂದು ಹಗರಣ ಬೆಳಕಿಗೆ ಬಂದಂತಾಗಿದೆ. ಗ್ಲೋಬಲ್ ಇಂಡೆಕ್ಸ್ ಸಂಸ್ಥೆಯ ಮೇಲಿನ ಆರೋಪ ಕೈಬಿಡಲು ಎಸಿಪಿ ರವೀಂದ್ರ ಗಡಾದಿ ೨೦ ಲಕ್ಷ ಹಣ ಪಡೆದು ಕಮಿಷನರ್ ವಿಚಾರಣೆಯ ಬಳಿಕ ಹಣವನ್ನು ಮರಳಿಸಿದ್ದ ಬಗ್ಗೆಯೂ ಪತ್ರಿಕೆ ವರದಿ ಮಾಡಿದ್ದನ್ನು ಇಲ್ಲಿ ಸ್ಮರಿಸಬಹುದಾಗಿದೆ.
ನೇಣು ಬಿಗಿದು ಆತ್ಮಹತ್ಯೆ : ನಗರದ ಕುಂಟಿಕಾನ ಕೆಎಸ್‌ಆರ್‌ಟಿಸಿ ಡಿಪೋ ಬಳಿಯ ನಿವಾಸಿ ನಾರ್ಬರ್ಟ್ ಕೊರೆಯಾ(೬೧) ಎಂಬವರು ಮನೆಯ ಪಕ್ಕಾಸಿಗೆ ನೇಣು ಬಿಗಿದು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಉರ್ವಾ ಠಾಣಾ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಮಂಗಳೂರು: ಬ್ಯಾರಿ ಸಾಹಿತ್ಯ ಅಕಾಡೆಮಿಯ ಅಧ್ಯಕ್ಷ ರಹೀಂ ಉಚ್ಚಿಲ್‌ರ ಕೊಲೆಯತ್ನ ನಡೆದು ನಾಳೆಗೆ ೧೫ ದಿನಗಳಾಗುತ್ತಿದೆ. ಆದರೂ ಇದುವರೆಗೆ ಕೃತ್ಯದ ಹಿಂದಿರುವ ಪ್ರಮುಖ ಆರೋಪಿಗಳನ್ನು ಬಂಧಿಸು ವಲ್ಲಿ ಇಲಾಖೆ ಎಡವಿದ್ದು, ಬಿಜೆಪಿ ಮುಖಂಡರು ಚಕಾರ ಎತ್ತದಿರು ವುದು ಸಾರ್ವಜನಿಕರಲ್ಲಿ ಅಚ್ಚರಿಗೆ ಕಾರಣವಾಗಿದೆ. ನಾಲ್ಕು ವರ್ಷಗಳ ಹಿಂದೆ ಬಿಜೆಪಿಗೆ ಸೇರಿದ್ದ ರಹೀಂ, ಸ್ವಂತ ಲಾಭಕ್ಕಾಗಿ ಆರ್‌ಎಸ್‌ಎಸ್ ಮುಖಂಡರನ್ನು ಸರ್ಮರ್ಥಿಸುವ ಕೆಲಸಕ್ಕೆ ಕೈಹಾಕುವ ಮೂಲಕ ಮುಸ್ಲಿಮರ ವಿರೋಧ ಕಟ್ಟಿಕೊಂಡಿದ್ದರು. ಎರಡು ತಿಂಗಳ ಹಿಂದೆ ಉಪ್ಪಿನಂಗಡಿಯಲ್ಲಿ ನಡೆದ ಹಿಂದೂ ಸಮಾಜೋತ್ಸವದಲ್ಲಿ ಕಲ್ಲಡ್ಕ ಪ್ರಭಾಕರ್ ಭಟ್ ಮುಸ್ಲಿಮರ ವಿರುದ್ಧ ಅವಹೇಳನಕಾರಿಯಾಗಿ ಮಾತನಾಡಿದ್ದಾರೆನ್ನುವ ಆರೋಪ ಕೇಳಿ ಬಂದಾಗ ಇಡೀ ಮುಸ್ಲಿಂ ಸಮುದಾಯವೇ ಭಟ್ ವಿರುದ್ಧ ನಿಂತಿತ್ತು. ಇದೇ ಸಂದರ್ಭದಲ್ಲಿ ಭಟ್ ಪರವಾಗಿ ನಿಂತ ಬಿಜೆಪಿ ಅಲ್ಪಸಂಖ್ಯಾತ ಮುಖಂಡರು ತಪ್ಪು ನಿವಾರಣಾ ಸಭೆಯನ್ನು ಆಯೋಜಿಸಿದಾಗ ರಹೀಂ ಉಚ್ಚಿಲ್ ಕಲ್ಲಡ್ಕ ಪರವಾಗಿ ಸಾಧ್ಯವಿರುವ ಮಟ್ಟಿಗೆ ಸಮರ್ಥನಾ ಭಾಷಣ ಮಾಡಿದ್ದು ಮುಸ್ಲಿಮರಲ್ಲಿ ಇನ್ನಷ್ಟು ಆಕ್ರೋಶಕ್ಕೆ ಕಾರಣವಾಗಿತ್ತು. ಆಗಲೇ ಅವರಿಗೆ ಕೆಲವೊಂದು ಬೆದರಿಕೆ ಕರೆಗಳೂ ಬಂದಿದ್ದವು.
ಕಮೀಷನರ್‌ಗೆ ಮನವಿ ಕೊಟ್ಟ ಬಳಿಕ ಎಲ್ಲಾ ತೊಂದರೆ ನಿವಾರಣೆಯಾ ಯಿತು ಎನ್ನುವಷ್ಟರಲ್ಲಿ ೧೫ ದಿನಗಳ ಹಿಂದೆ (ಮಾ.೧೫) ರಹೀಂರನ್ನು ಅಕಾಡೆಮಿ ಕಚೇರಿಯಲ್ಲೇ ಕಡಿದು ಕೊಲೆ ಮಾಡುವ ಯತ್ನ ನಡೆದಿತ್ತು.  ಘಟನೆ ನಡೆದು ನಾಳೆಗೆ ೧೫ ದಿನಗಳು ಪೂರ್ತಿಯಾಗುತ್ತಿದ್ದು ಇದುವರೆಗೆ ಕೇವಲ ಓರ್ವ ಆರೋಪಿಯನ್ನು ಮಾತ್ರವೇ ಪೊಲೀಸರು ಬಂಧಿಸಿದ್ದಾರೆ.
ಸಂಘಪರಿವಾರ ಬೆಂಬಲಿತ ಸಂಘಟನೆಗಳು ಅಥವಾ ಬಿಜೆಪಿ ಮುಖಂಡರಿಗೆ ಸಣ್ಣ ಪ್ರಮಾಣದ ಅನ್ಯಾಯವಾದರೂ ಬೀದಿಗಿಳಿದು ಹೋರಾಟ, ಪ್ರತಿಭಟನೆ ನಡೆಸುವ ಹಾಗೂ ಪತ್ರಿಕಾಗೋಷ್ಟಿ ನಡೆಸಿ ಖಂಡನೆ ವ್ಯಕ್ತಪಡಿಸುವ ಮುಖಂಡರು ರಹೀಂ ವಿಷಯದಲ್ಲಿ ಮಾತ್ರ ಮೌನವಾಗಿದ್ದಾರೆ. ಇಷ್ಟಕ್ಕೂ ರಹೀಂ ಮೇಲೆ ನಡೆದ ದಾಳಿಯ ಹಿಂದೆ ವಿವಿಧ ಕಾರಣಗಳು ಇದೆಯೆನ್ನಲಾಗುತ್ತಿದ್ದರೂ ಅವರು ಬಿಜೆಪಿಗಾಗಿ ಇಡೀ ಮುಸ್ಲಿಂ ಸಮುದಾಯವನ್ನು ಎದುರು ಹಾಕಿಕೊಂಡಿರುವುದು ಘಟನೆ ನಡೆದ ಬಳಿಕ ಮೇಲ್ನೋಟಕ್ಕೆ ಸಾಬೀತಾಗಿದೆ.
ಘಟನೆಯ ಬಳಿಕ ಕೃಷ್ಣ ಪಾಲೆಮಾರ್, ಕಲ್ಲಡ್ಕ ಪ್ರಭಾಕರ್ ಭಟ್, ಯೋಗೀಶ್ ಭಟ್ ಸಹಿತ ಇನ್ನೂ ಕೆಲವು ಬಿಜೆಪಿ ಮುಖಂಡರು ಆಸ್ಪತ್ರೆಗೆ ಭೇಟಿ ನೀಡಿದರಾದರೂ ನಾಮ್‌ಕೇವಾಸ್ತೆ ಎಂದು ಆ ಪಕ್ಷದಲ್ಲಿರುವ ಮುಸ್ಲಿಮರೇ ಹೇಳುತ್ತಿದ್ದಾರೆ. ಇದೇ ಮಾದರಿಯ ದಾಳಿಯು ಇನ್ಯಾವುದೇ ಪಕ್ಷದ ಮುಖಂಡರು ಮಾತ್ರವೇಕೆ ಕೇವಲ ಮುಸ್ಲಿಂ ಹೆಸರಿರುವವನ ಮೇಲೆ ನಡೆದಿದ್ದರೂ ವಿವಿಧ ಸಂಘಟನೆಗಳು ಬೀದಿಗಿಳಿಯುತ್ತಿದ್ದವು. ಅಷ್ಟೇ ಅಲ್ಲದೆ ಆತ ಗುಣಮುಖನಾಗಿ ಮನೆಗೆ ಹೋಗುವವರೆಗೂ ಆಸ್ಪತ್ರೆಯ ಬಾಗಿಲಲ್ಲಿ ಕುಳಿತುಕೊಳ್ಳುತ್ತಿದ್ದರು. ಆದರೆ ರಹೀಂ ವಿಷಯದಲ್ಲಿ ಅದ್ಯಾವುದೂ ನಡೆದಿಲ್ಲ. ಅಷ್ಟೇ ಏಕೆ ಅವರನ್ನು ಬದುಕಿಸಿದ ರಿಯಾಝ್‌ರಿಗೂ ಕೆಲವೊಂದು ಕರೆಗಳು ಬಂದಿದೆ ಎನ್ನಲಾಗುತ್ತಿದೆ. ಬಿಜೆಪಿಯವರೂ ರಹೀಂರನ್ನು ಮರೆತೇ ಬಿಟ್ಟಿರುವುದನ್ನು ಗಮನಿಸಿದಾಗ ಅವರ ಮೇಲೆ ಮುಖಂಡರು ಮತ್ತು ಕಾರ್ಯಕರ್ತರು ಎಷ್ಟು ಅಭಿಮಾನ ಇಟ್ಟಿದ್ದಾರೆ ಎಂದು ತೋರಿಸುತ್ತದೆ ಎಂಬ  ಮಾತುಗಳು ಸಾರ್ವಜನಿಕರಿಂದ ಕೇಳಿ ಬರುತ್ತಿದೆ. ಅಲ್ಲದೆ ಬಿಜೆಪಿಯ ಮೇಲೆ ವಿಶ್ವಾಸವಿಟ್ಟು ಕೆಲಸ ಮಾಡುವುದಾದರೂ ಹೇಗೆ ಎನ್ನುವ ಪ್ರಶ್ನೆಯೂ ಬಿಜೆಪಿಯಲ್ಲಿರುವ ಅಲ್ಪಸಂಖ್ಯಾತರದ್ದಾಗಿದೆ.
ಖಾದರ್ ವಿರುದ್ಧ ವೇದಿಕೆ ಕಟ್ಟಿದ್ದರು!
ಸತತ ಎರಡು ಬಾರಿ ಮಂಗಳೂರು ಕ್ಷೇತ್ರದ ಶಾಸಕ ರಾಗಿ ಆಯ್ಕೆಯಾಗಿರುವ ಯು.ಟಿ.ಖಾದರ್ ವಿರುದ್ಧ ಬಿಜೆಪಿಗೆ ಒಂದು ಕಣ್ಣು ಇದ್ದೇ ಇದೆ. ಮುಂದಿನ ಚುನಾವಣೆ ಯಲ್ಲಾದರೂ ಅವರನ್ನು ಸೋಲಿಸಿ ಕ್ಷೇತ್ರವನ್ನು ವಶಕ್ಕೆ ತೆಗೆದುಕೊಳ್ಳಬೇಕು ಎನ್ನುವ ಕನಸನ್ನು ಬಿಜೆಪಿ ಮುಖಂ ಡರು ಕಾಣುತ್ತಿದ್ದಾರೆ. ಇವೆಲ್ಲವನ್ನೂ ಹತ್ತಿರದಿಂದ ತಿಳಿದಿ ರುವ ರಹೀಂ, ಉಳ್ಳಾಲ ಮತದಾರರ ಹಿತರಕ್ಷಣಾ ವೇದಿಕೆ ಎನ್ನುವ ಹೆಸರಿನ ಸಂಘಟನೆ ಕಟ್ಟುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಇದಕ್ಕೆ ಹರೇಕಳ ಮೂಲದ ಉದ್ಯಮಿ ಯೋರ್ವರು ಹಣಕಾಸಿನ ನೆರವನ್ನು  ನೀಡಲು ಮುಂದಾಗಿದ್ದರೆ ರಹೀಂ, ಖಾದರ್ ವಿರೋಧಿಗಳನ್ನು ಸೆಳೆಯುವ ತಂತ್ರ ರೂಪಿಸಿದ್ದರು.  ಐಷಾರಾಮಿ ಹೋಟೆಲ್‌ನಲ್ಲಿ ಕೆಲವು ಸುತ್ತಿನ ಸಭೆಗಳೂ ನಡೆದಿದ್ದು ಮುಸ್ಲಿಂಲೀಗ್, ಜೆಡಿಎಸ್, ಬಿಜೆಪಿಯ ಕೆಲವು ಮುಖಗಳು ಸಂಘಟನೆಯಲ್ಲಿ ಕಾಣಿಸಿಕೊಂಡಿದ್ದವು. ೧೮ಕ್ಕೆ ಉಳ್ಳಾಲದಲ್ಲಿ ಸಭೆಯನ್ನೂ ನಿಗದಿಗೊಳಿಸಲಾಗಿದ್ದು ಅದಕ್ಕೂ ಮುನ್ನ ೧೪ರ ಬುಧವಾರದಂದು ರಾತ್ರಿ ರಹೀಂ ನೇತೃತ್ವದಲ್ಲಿ ನಗರದ ಐಷಾರಾಮಿ ಹೋಟೆಲ್‌ನಲ್ಲಿ ಪತ್ರಿಕಾಗೋಷ್ಟಿಯನ್ನೂ ನಡೆಸಲಾಗಿತ್ತು. ಆದರೆ ಮರುದಿನವೇ ರಹೀಂ ಮೇಲೆ ದಾಳಿ ನಡೆದಿತ್ತು. ಅವರ ನಡೆ ಕಾಂಗ್ರೆಸ್ ಕಾರ್ಯ ಕರ್ತರಲ್ಲಿ ಅಸಮಾಧಾನಕ್ಕೆ ಕಾರಣವಾಗಿತ್ತಲ್ಲದೆ ಬಹಿರಂಗ ಸಭೆಗೆ ಮೂರು ದಿನಗಳಿರುವಾಗಲೇ ದಾಳಿ ನಡೆದಿರುವುದು ಕುತೂಹಲಕ್ಕೆ ಕಾರಣವಾಗಿತ್ತು. ಇದೆಲ್ಲಾ ನಡೆದ ಹಿನ್ನೆಲೆಯಲ್ಲಿ ವೇದಿಕೆಯ ಕಾರ್ಯಕ್ರಮಕ್ಕೂ ತಾತ್ಕಾಲಿಕ ಬ್ರೇಕ್ ಬಿದ್ದಿದೆ.

ಕಾಸರಗೋಡು: ಎಸ್‌ಎಸ್‌ಎಲ್‌ಸಿ ವಿದ್ಯಾರ್ಥಿಯನ್ನು ಅದೇ ಶಾಲೆಯ ಹಳೆ ವಿದ್ಯಾರ್ಥಿಗಳು ಗಂಭೀರವಾಗಿ ಇರಿದು ಗಾಯಗೊಳಿಸಿದ  ಘಟನೆ ನಗರದ ಹೈಸ್ಕೂಲಿನಲ್ಲಿ ಸಂಭವಿಸಿದೆ.
ಬೆನ್ನುಮೂಳೆಗೆ ಉಂಟಾದ ಆಳವಾದ ಇರಿತಕ್ಕೊಳಗಾದ ಎಸ್.ಎಸ್. ಎಲ್.ಸಿ ವಿದ್ಯಾರ್ಥಿಯನ್ನು ಚಿಂತಾಜನಕ ಸ್ಥಿತಿಯಲ್ಲಿ ಮಂಗಳೂರಿಗೆ ಕೊಂಡೊ ಯ್ಯಲಾಗಿದೆ. ಕಾಸರಗೋಡು ನಗರ ಮಧ್ಯದ ಸರಕಾರಿ ಹೈಯರ್ ಸೆಕೆಂಡರಿ ಶಾಲೆಯಲ್ಲಿ ನಿನ್ನೆ ಅಪರಾಹ್ನ ೨ ಗಂಟೆ ವೇಳೆಗೆ ಕೃತ್ಯ ಸಂಭವಿಸಿದೆ. ಎಸ್.ಎಸ್.ಎಲ್.ಸಿ ವಿದ್ಯಾರ್ಥಿ, ಉಳಿಯತ್ತಡ್ಕ ಭಿಲಾಲ್‌ನಗರದ ದಿ. ಅಬೂಬಕ್ಕರ್ ಅವರ ಪುತ್ರನೂ ಆದ ಮುನಾಫ್(೧೬) ಎಂಬಾತನೇ ಮಾರಣಾಂತಿಕ ಇರಿತಕ್ಕೊಳಗಾದ ನತದೃಷ್ಟ.
ಈ ಬಾರಿಯ ಎಸ್.ಎಸ್.ಎಲ್.ಸಿ ಪರೀಕ್ಷೆ ಮೊನ್ನೆ ಸೋಮವಾರ ಕೊನೆಗೊಂಡಿತ್ತಾದರೂ ಅಗತ್ಯ ಕೆಲಸದಿಂದ ಮುನಾಫ್ ನಿನ್ನೆ ಶಾಲೆಗೆ ಬಂದಿದ್ದ. ಈ ವೇಳೆ ದಿಢೀರ್ ದಾಳಿ ನಡೆಸಿದ ಶಾಲೆಯ ಹಳೆ ವಿದ್ಯಾರ್ಥಿಗಳಾದ ಬಟ್ಟಂ ಪಾರೆಯ ಮಹೇಶ, ನುಳ್ಳಿಪ್ಪಾಡಿಯ ಅಭಿಜಿತ್, ವಿಷ್ಣು ಎಂಬವರ ನೇತೃತ್ವದ ಆರು ಮಂದಿ ಮುನಾಫ್‌ನ ಮೇಲೆರಗಿ ಶಾಲಾ ಸ್ಟಾಫ್ ರೂಮ್ ಎದುರಲ್ಲೇ ಚೂರಿಯಿಂದ ಬೆನ್ನಿಗೆ ಬಲವಾಗಿ ಇರಿದು ಪರಾರಿಯಾಗಿದ್ದರು. ಜನರಲ್ ಆಸ್ಪತ್ರೆಗೆ ಕೊಂಡೊಯ್ದ ಈತನ ಸ್ಥಿತಿ ಚಿಂತಾಜನಕವಾಗಿರುವ ಹಿನ್ನೆಲೆಯಲ್ಲಿ ಮಂಗಳೂರಿಗೆ ಸಾಗಿಸಲಾಯಿತು. ಆರೋಪಿಗಳ ಪೈಕಿ ವಿಷ್ಣು ಎಂಬಾತ ಮುನಾಫ್‌ನ ಸಹಪಾಠಿಯಾಗಿದ್ದು, ಇವರೀರ್ವರ ನಡುವೆ ಅದೇನೋ ದ್ವೇಷವಿತ್ತೆನ್ನಲಾಗುತ್ತಿದೆ. ಇದುವೇ ಇರಿತದಲ್ಲಿ ಕೊನೆಗೊಂಡಿದೆ.
ಘಟನಾ ಸ್ಥಳಕ್ಕೆ ಎ.ಎಸ್.ಪಿ. ಟಿ.ಕೆ. ಶಿಬು ನೇತೃತ್ವದಲ್ಲಿ ಪೊಲೀಸರು ಬಂದು ಮಾಹಿತಿ ಸಂಗ್ರಹಿಸಿದ್ದಾರೆ. ಆರೋಪಿಗಳ ಬಂಧನಕ್ಕಾಗಿ ಅವರ ಮನೆಗಳಿಗೆ ದಾಳಿ ನಡೆಸಲಾಯಿತಾದರೂ ಎಲ್ಲ ಆರೋಪಿಗಳೂ ತಲೆಮರೆಸಿ ಕೊಂಡಿದ್ದಾರೆ.

ಸುಳ್ಯ: ಮನೆಗೆ ಬೆಂಕಿ ಬಿದ್ದು ಸಂಪೂರ್ಣ ಸುಟ್ಟುಹೋಗಿ ರುವ ಘಟನೆ ಸೋಮವಾರ ತಡರಾತ್ರಿ ಅಮರ ಪಡ್ನೂರು ಗ್ರಾಮದ ಜೋಗಿಯಡ್ಕ ಎಂಬಲ್ಲಿ ನಡೆದಿದ್ದು, ೧೧ ಲಕ್ಷ ರೂ. ನಷ್ಟ ಸಂಭವಿಸಿದೆ.
ಜೋಗಿಯಡ್ಕದಲ್ಲಿ ಕೆ.ಜಿ.ಆನಂದ ಗೌಡ ಎಂಬವರು ತಮ್ಮ ಮನೆಗೆ ಹೊಂದಿಕೊಂಡಂತೆ ಎದುರು ಭಾಗದಲ್ಲಿ ಸಣ್ಣ ಜೀನಸು, ತಂಪುಪಾನೀಯ ಅಂಗಡಿಯನ್ನು ನಡೆಸುತ್ತಿದ್ದರು. ಸೋಮವಾರ ರಾತ್ರಿ ೨ ಗಂಟೆ ವೇಳೆಗೆ ಮನೆಯಲ್ಲಿ ವಿದ್ಯುತ್ ಶಾರ್ಟ್ ಸರ್ಕ್ಯೂಟ್ ಸಂಭವಿಸಿದ್ದು, ಮನೆಯಲ್ಲಿದ್ದ ಎಲ್ಲಾ ವಸ್ತುಗಳು ಸಂಪೂರ್ಣ ಸುಟ್ಟುಹೋಗಿದೆ. ಟಿ.ವಿ., ಫ್ರಿಡ್ಜ್, ೨೦ ಗ್ರಾಂ ಚಿನ್ನಾಭರಣ, ೧೫ ಸಾವಿರ ನಗದು, ಬಟ್ಟೆ-ಬರೆ, ಪಾತ್ರೆ-ಪಗಡಿ, ೮ ಕ್ವಿಂಟಾಲ್ ಕಾಳುಮೆಣಸು, ೬೦ ಸಾವಿರ ರೂ. ಮೌಲ್ಯದ ಅಡಿಕೆ, ಅಂಗಡಿಯಲ್ಲಿದ್ದ ಸುಮಾರು ಒಂದೂವರೆ ಲಕ್ಷ ಮೌಲ್ಯದ ಜಿನಸು ಸಾಮಗ್ರಿ ಎಲ್ಲಾ ಸುಟ್ಟುಹೋಗಿದೆ. ಮನೆಯಲ್ಲಿದ್ದ ಗ್ಯಾಸ್ ಸಿಲಿಂಡರ್ ಕೂಡಾ ಸ್ಪೋಟಗೊಂಡಿದ್ದು, ಬೆಂಕಿ ಮತ್ತಷ್ಟು ಹಬ್ಬಲು ಕಾರಣವಾಯಿತು. ಮನೆಯ ಹಿಂಬದಿ ಇಳಿಸಿದ ಸಣ್ಣ ಕೋಣೆಯಲ್ಲಿ ಆನಂದ ಗೌಡ, ಅವರ ಪತ್ನಿ ಹಾಗೂ ಇಬ್ಬರು ಮಕ್ಕಳು ಮಲಗಿದ್ದರು. ಫ್ಯಾನ್ ತಿರುಗುತ್ತಿದ್ದುರಿಂದ ಅದರ ಶಬ್ದಕ್ಕೆ ಮನೆಯ ಎದುರು ಭಾಗದಲ್ಲಿ ಬೆಂಕಿ ಕಾಣಿಸಿಕೊಂಡಿದ್ದು, ಅವರ ಗಮನಕ್ಕೆ ಬರಲಿಲ್ಲ ಎನ್ನಲಾಗಿದೆ. ರಾತ್ರಿ ಎರಡೂವರೆ ಗಂಟೆಗೆ ಹೆಂಚು ಒಡೆದು ಬೀಳುವ ಶಬ್ದ ಕೇಳಿ ಎಚ್ಚರವಾಗಿದೆ. ಕೂಡಲೇ ನೆರೆಮನೆಯವರಿಗೆ ಸುದ್ದಿ ತಿಳಿದು ಎಲ್ಲರೂ ಸೇರಿ ಬೆಂಕಿ ನಂದಿಸುವ ಯತ್ನ ನಡೆಸಿದ್ದಾರೆ. ಆದರೆ ವಿದ್ಯುತ್ ಕೈಕೊಟ್ಟ ಪರಿಣಾಮ ಪಂಪ್‌ನಲ್ಲಿ ನೀರು ಹಾಯಿಸಲು ಸಾಧ್ಯವಾಗಿಲ್ಲ. ಬಳಿಕ ಅಲ್ಲಿಗೆ ಬಂದ ಅಗ್ನಿಶಾಮಕ ದಳ ಬೆಂಕಿ ನಂದಿಸಿದೆ.

ಉಡುಪಿ: ಮಲ್ಪೆಯ ಸೈಂಟ್ ಮೇರೀಸ್ ಐಲ್ಯಾಂಡ್‌ನಲ್ಲಿ ಕಳೆದ ತಿಂಗಳು ನಡೆದ ರೇವ್ ಪಾರ್ಟಿಯ ಬಗ್ಗೆ ತನಿಖೆ ನಡೆಸಿ ವರದಿ ಸಲ್ಲಿಸಲು ಸರಕಾರದಿಂದ ನಿಯುಕ್ತಿಗೊಂಡಿದ್ದ ಮೈಸೂರು ವಿಭಾಗದ ಆಯುಕ್ತರಾದ ಜಯಂತಿ ಅವರು ಇಂದು ಬೆಳಗ್ಗೆ (ಬುಧವಾರ) ಉಡುಪಿಗೆ ಆಗಮಿಸ ಲಿದ್ದು, ತನಿಖೆ ಆರಂಭಿಸಲಿದ್ದಾರೆ.
ಬೆಳಗ್ಗೆ ಐಲ್ಯಾಂಡ್‌ಗೆ ಭೇಟಿ ನೀಡಿ ಸ್ಥಳ ಪರಿಶೋಧನೆ ನಡೆಸಲಿರುವ ತನಿಖಾಧಿಕಾರಿ ಜಯಂತಿಯವರು, ಮಧ್ಯಾಹ್ನ ೩ ಗಂಟೆಗೆ ಮಣಿಪಾಲದ ಎಂಡ್‌ಪಾಯಿಂಟ್‌ನಲ್ಲಿರುವ ಜಿಲ್ಲಾ ಕಚೇರಿಗಳ ಸಂಕೀರ್ಣದಲ್ಲಿ ಸಾರ್ವ ಜನಿಕರಿಂದ ದೂರುಗಳನ್ನು ಸ್ವೀಕರಿ ಸಲಿದ್ದಾರೆ ಎಂದು ತಿಳಿದುಬಂದಿದೆ. ಗುರುವಾರ ಬೆಳಗ್ಗೆ ೧೧ ಗಂಟೆಗೆ ಮತ್ತೆ ಜಿಲ್ಲಾ ಕಚೇರಿಗಳ ಸಂಕೀರ್ಣದಲ್ಲಿ ರೇವ್‌ಪಾರ್ಟಿಯ ಬಗ್ಗೆ ದೂರು ಕೊಡಲು ಸಾರ್ವಜನಿಕರಿಂದ ಅಹವಾಲುಗಳನ್ನು ಸ್ವೀಕರಿಸಲಿದ್ದಾರೆ. ಆಸಕ್ತರಿಗೆ ಮೌಖಿಕವಾಗಿಯೂ ದೂರು ನೀಡಲು ಅವಕಾಶವಿದೆ ಎನ್ನಲಾಗಿದೆ.
ಮಲ್ಪೆ ರೇವ್‌ಪಾರ್ಟಿಯನ್ನು ಮುಖ್ಯಮಂತ್ರಿ ಡಿ.ವಿ.ಸದಾನಂದ ಗೌಡ ಹಾಗೂ ಅಂದಿನ ಜಿಲ್ಲಾ ಉಸ್ತುವಾರಿ ಸಚಿವರಾಗಿದ್ದ ಡಾ.ವಿ.ಎಸ್.ಆಚಾರ್ಯ ಅವರು ಸಮರ್ಥನೆ ಮಾಡಿಕೊಂಡಿ ದ್ದರು. ಈ ಬಗ್ಗೆ ಕಳೆದ ಸದನದಲ್ಲಿ ವಿಧಾನಪರಿಷತ್ ಸದಸ್ಯರಾದ ಪ್ರತಾಪ ಚಂದ್ರ ಶೆಟ್ಟಿ, ವಿಧಾನಸಭಾ ಸದಸ್ಯರಾದ ಗೋಪಾಲ ಭಂಡಾರಿ ಮೊದಲಾದವರು ವಿಷಯ ಪ್ರಸ್ತಾಪ ಮಾಡಿದ್ದರು. ಸಿದ್ದರಾಮಯ್ಯ, ಮೋಟಮ್ಮ, ಶ್ರೀ ರಾಮುಲು ಮುಂತಾದವರು ಸರಕಾರದ ಪ್ರವಾಸೋದ್ಯಮ ನೀತಿಯನ್ನು ತೀವ್ರವಾಗಿ ಟೀಕಿಸಿದ್ದರು. ವಿರೋಧ ಪಕ್ಷಗಳಿಂದ, ಸಾರ್ವಜನಿಕರ ಭಾರೀ ಪ್ರತಿಭಟನೆಯ ಬಳಿಕ ಸರಕಾರ ರೇವ್ ಪಾರ್ಟಿ ಬಗ್ಗೆ ತನಿಖೆ ನಡೆಸಿ ವರದಿ ಸಲ್ಲಿಸಲು ಮೈಸೂರು ವಿಭಾಗದ ಆಯುಕ್ತರಾದ ಜಯಂತಿ ಅವರನ್ನು ನೇಮಕ ಮಾಡಿ ಆದೇಶಿಸಿತ್ತು. ಫೆಬ್ರವರಿ ೩,೪ ಮತ್ತು ೫ರಂದು ಮೂರು ದಿನಗಳ ಕಾಲ ಹಗಲು-ರಾತ್ರಿ ಎನ್ನದೆ ಸೇಂಟ್ ಮೇರೀಸ್ ಐಲ್ಯಾಂಡ್‌ನಲ್ಲಿ ಅಂತಾರಾಷ್ಟ್ರೀಯ ಸಂಗೀತ ಮತ್ತು ಕಲಾ ಉತ್ಸವ (ಸ್ಪ್ರಿಂಗ್ ಝೂಕ್) ಎಂಬ ಹೆಸರಿನಲ್ಲಿ ಬಹಿರಂಗ ನಂಗಾನಾಚ್ ನಡೆದಿತ್ತು. ಮೊದಲ ದಿನವಾದ ಫೆ.೩ರಂದು ಬೆಳಗ್ಗೆ ಐಲ್ಯಾಂಡ್‌ಗೆ ಹೋಗುವ ಮೊದಲೇ ಮಲ್ಪೆಯ ಬೋಟ್ ನಿಲುಗಡೆಯ ಸ್ಥಳದಲ್ಲೇ ಅಮಲು ಪದಾರ್ಥಗಳನ್ನು ಸೇವಿಸಿದ ವಿದೇಶಿ ಜೋಡಿಗಳು ಅರೆ ಬೆತ್ತಲೆ ನೃತ್ಯ ಮಾಡಿದ್ದರು. ಮಲ್ಪೆಗೆ ಬರುವಾಗಲೇ ತಮ್ಮ ತಮ್ಮ ಬ್ಯಾಗ್‌ಗಳಲ್ಲಿ ತಂದಿದ್ದ ಗಾಂಜಾವನ್ನು ಕೆಲವರು ಪ್ರತ್ಯೇಕ ಪ್ಯಾಕೆಟ್‌ಗಳಲ್ಲಿ ಹಾಕಿ ಇತರರಿಗೆ ಮಾರಾಟ ಮಾಡಿದ್ದರು. ಇವುಗಳನ್ನೆಲ್ಲ ಖಾಸಗಿ ಟಿವಿ ಚಾನೆಲ್‌ಗಳು ಚಿತ್ರೀಕರಿಸಿದ್ದವು. ಪತ್ರಿಕಾ ಛಾಯಾಗ್ರಾಹಕರು ಛಾಯಾಚಿತ್ರ ತೆಗೆದಿದ್ದರು. ಈ ಬಗ್ಗೆ ವರದಿ ಕೂಡ ಪ್ರಕಟವಾಗಿತ್ತು.
 ಮಧ್ಯಾಹ್ನ ಐಲ್ಯಾಂಡ್ ಪ್ರವೇಶಿಸಿದ ಜೋಡಿಗಳು ಬಾಡಿಗೆ ಕೊಟ್ಟು ಟೆಂಟ್‌ಗಳಲ್ಲಿ ಉಳಕೊಂಡಿದ್ದರು ಮತ್ತು ರಾತ್ರಿ ಹೊತ್ತು ಮದ್ಯ ಸೇವಿಸಿದ್ದು ಅಲ್ಲದೆ, ಸಾಂಸ್ಕೃತಿಕ ಉತ್ಸವ ನಡೆಯುತ್ತಿದ್ದ ವೇದಿಕೆಯ ಮೇಲೆಯೇ ಎಲ್ಲರೆದುರೇ ನಾಚಿಕೆಯೇ ಇಲ್ಲದೆ ತೀರ ಅಶ್ಲೀಲವಾಗಿ ವರ್ತಿಸಿದ್ದರು. ಉಡುಪಿ ಜಿಲ್ಲಾಧಿಕಾರಿ ಡಾ.ಎಂ.ಟಿ.ರೇಜು, ಶಾಸಕ ಕೆ.ರಘುಪತಿ ಭಟ್ ಹಾಗೂ ಶಾಸಕರ ಬೆಂಬಲಿಗರು ಈ ಉತ್ಸವದ ಸಂಪೂರ್ಣ ವ್ಯವಸ್ಥೆಯನ್ನು ನೋಡಿಕೊಂಡಿದ್ದರು.
 ಉಡುಪಿಯ ಕೆ.ಎಂ.ಮಾರ್ಗದ ಚರ್ಚ್ ಕಾಂಪ್ಲೆಕ್ಸ್‌ನಲ್ಲಿರುವ ೩ ಡಬ್ಲ್ಯೂ ಕಾನ್ಸೆಪ್ಟ್ ಎಂಬ ಸಂಸ್ಥೆಯ ಗಿರೀಶ್ ಶೆಟ್ಟಿ ಎಂಬವರ ಹೆಸರಿನಲ್ಲಿ ಉಡುಪಿ ಜಿಲ್ಲಾಧಿಕಾರಿ ಡಾ.ಎಂ.ಟಿ.ರೇಜು ಅವರಿಂದ ನೇರವಾಗಿ ಈ ರೇವ್ ಪಾರ್ಟಿಗೆ ಪರವಾನಿಗೆ ಪಡೆಯಲಾಗಿತ್ತು. ಗಿರೀಶ್ ಶೆಟ್ಟಿ ಅವರು ಶಾಸಕ ಭಟ್ ಅವರ ಕ್ಲಾಸ್‌ಮೇಟ್ ಎನ್ನಲಾಗಿದೆ.
 ಉತ್ಸವ ಹೊರತುಪಡಿಸಿ ಇನ್ನಾವುದೇ ಕಾನೂನು ಬಾಹಿರ ಕಾರ್ಯ ಕ್ರಮದಲ್ಲಿಯೂ ಇಲಾಖಾ ಲೋಗೋವನ್ನು ಉಪಯೋಗಿಸಿ ಕೊಳ್ಳಬಾರದು ಎಂಬ ಷರತ್ತಿನೊಂದಿಗೆ ಕಳೆದ ವರ್ಷದ ಡಿಸೆಂಬರ್ ೨೩ರಂದು ರಾಜ್ಯ ಪ್ರವಾಸೋದ್ಯಮ ನಿರ್ದೇಶನಾಲಯದ ನಿರ್ದೇಶಕರು ಉತ್ಸವದಲ್ಲಿ ಪ್ರವಾಸೋದ್ಯಮ ಇಲಾಖೆಯ ಲೋಗೋವನ್ನು ಉಪಯೋಗಿಸಲು ಅನುಮತಿಯನ್ನು ನೀಡಿದ್ದರು. ಗಿರೀಶ್ ಶೆಟ್ಟಿಯವರು ಡಿ.೮ರಂದು ಉತ್ಸವದಲ್ಲಿ ಲೋಗೋವನ್ನು ಉಪಯೋಗಿ ಸಲು ಅನುಮತಿ ಕೋರಿ ರಾಜ್ಯ ಪ್ರವಾಸೋದ್ಯಮ ಇಲಾಖೆಗೆ ಪತ್ರವನ್ನು ಬರೆದಿದ್ದರು.