ಮಾರ್ಚ್ ಹನ್ನೊಂದರ ಪತ್ರಿಕೆಯ ನಿಮ್ಮಿಂದ ವಿಭಾಗದಲ್ಲಿ ಹಸನ್ ಮಲ್ಲೂರು ಹೆಸರಿನಲ್ಲಿ ಪ್ರಕಟಗೊಂಡ 'ಸ್ವಾಗತ ಸಮಿತಿಗೆ ಇಂಥವರು ಬೇಕಾ? ಎಂಬ ಬರಹಕ್ಕೆ ಪ್ರತಿಕ್ರಿಯೆ. ಸದ್ರಿ ನನ್ನ ಹೆಸರಿನಲ್ಲಿ ಪ್ರಕಟವಾದ ಈ ಬರಹಕ್ಕೂ ನನಗೂ ಯಾವುದೇ ಸಂಬಂಧವಿರುವುದಿಲ್ಲ. ನನ್ನ ಹೆಸರನ್ನು ದುರ್ಬಳಕೆ ಮಾಡಲು ಕೆಲ ಹಿತಾಸಕ್ತಿಗಳು ಈ ಬರಹವನ್ನು ಪತ್ರಿಕೆಯಲ್ಲಿ ನೀಡಿರುತ್ತಾರೆ. ನಾನು ಮಲ್ಲೂರು ಸಅದಿಯೊಂದಿಗೆ ನಿಕಟ ಬಾಂಧವ್ಯ ಹೊಂದಿದ್ದು, ಎಲ್ಲಾ ಸುನ್ನಿ ಚಟುವಟಿಕೆಗಳಲ್ಲಿ ನಿರಂತರವಾಗಿ ಭಾಗವಹಿಸು ತ್ತಿದ್ದೇನೆ. ಇದನ್ನು ಸಹಿಸದ ಕೆಲ ಪಟ್ಟಭದ್ರ ಹಿತಾಸಕ್ತಿಗಳು ನನ್ನ ಹಾಗೂ ಮಲ್ಲೂರು ಸಅದಿಯವರ ಬಾಂಧವ್ಯಕ್ಕೆ ಹುಳಿಹಿಂಡಲು ಪ್ರಯತ್ನಿಸಿರುವರು. ಜಿಲ್ಲೆಯ ಕುಗ್ರಾಮ ವಾಗಿ ಗುರುತಿಸಿಕೊಳ್ಳುತ್ತಿದ್ದ ಮಲ್ಲೂರಿನಲ್ಲಿ ಧಾರ್ಮಿಕ ಹಾಗೂ ಲೌಕಿಕ ಶಿಕ್ಷಣ ಸಂಸ್ಥೆಗ ಳನ್ನು ಕಟ್ಟಿ ಬೆಳೆಸಿ ಸುನ್ನತ್ ಜಮಾತ್‌ಗಾಗಿ ಮಲ್ಲೂರು ಸಅದಿಯವರು ಅಹೋರಾತ್ರಿ ಶ್ರಮಿಸುತ್ತಿದ್ದಾರೆ.

ಈ ಸಂಸ್ಥೆಯಲ್ಲಿ ನಮ್ಮ ಮನೆಯ ಮಕ್ಕಳು ವಿದ್ಯಾರ್ಜನೆ ಮಾಡುತ್ತಿದ್ದಾರೆ. ಈ ಸಂಸ್ಥೆ ಕರ್ನಾಟಕದಲ್ಲಿ ಅಭಿಮಾನದ ಕೇಂದ್ರವಾಗಿ ಗುರುತಿಸಿಕೊಂಡಿದೆ. ಎಪ್ರಿಲ್ ಹನ್ನೊಂ ದರಂದು ನೆಹರೂ ಮೈದಾನದಲ್ಲಿ 'ಮಾನವೀಯತೆಯ ಜಾಗೃತಿಗಾಗಿ ಎಂಬ ಘೋಷ ಣೆಯೊಂದಿಗೆ ಮಾನವತಾ ಮಹಾ ಸಂಗಮ ನಡೆಯಲಿದ್ದು, ಇದು ಬಹಳ ದೊಡ್ಡ ಸಂಗಮವಾದುದರಿಂದ ಇದರ ಕಾರ್ಯನಿರ್ವಹಣೆಗೆ ಕ್ರಿಯಾಶೀಲ, ಪ್ರಾಮಾಣಿಕರೇ ಬೇಕಾಗಿರುತ್ತಾರೆ. ಇಂಥದ್ದೊಂದು ಸ್ವಾಗತ ಸಮಿತಿಯಲ್ಲಿ ಜನರಲ್ ಕನ್ವೀನರ್ ಆಗಿ ಎಂ.ಪಿ.ಎಂ ಅಶ್ರಫ್ ಸಅದಿ ಮಲ್ಲೂರು ಇವರು ಇದ್ದರೆ ಸಮ್ಮೇಳನವು ಐತಿಹಾಸಿಕವಾಗ ಲಿದೆಯೆಂಬುದು ಕರ್ನಾಟಕದ ಸುನ್ನಿ ಮಕ್ಕಳಿಗೆ ತಿಳಿದ ಸಂಗತಿ ತಾನೇ. ಆದುದರಿಂದ ಸ್ವಾಗತ ಸಮಿತಿಗೆ ಇಂಥವರೇ ಬೇಕು.

ಹಸನ್ ಬಾವಾ, ಮಲ್ಲೂರು

ನಾಟೆಕಲ್‌ನಿಂದ ಮಂಜನಾಡಿಗೆ ಹೋಗುವ ರಸ್ತೆಯಲ್ಲಿರುವ ತೆಂಗಿನ ತೋಟಕ್ಕೆ ಕೋಳಿಗಳ ತ್ಯಾಜ್ಯಗಳನ್ನು ಕೋಳಿ ವ್ಯಾಪಾರಸ್ಥರು ಎಸೆಯು ತ್ತಿದ್ದು, ಇದರಿಂದ ರಸ್ತೆಯಲ್ಲಿ ಸಂಚರಿಸುವುದೇ ದುಸ್ತರವಾಗಿದೆ. ಕೊಳೆತ ಕೋಳಿ ತ್ಯಾಜ್ಯಗಳ ದುರ್ವಾ ಸನೆಯಿಂದ ಬಸ್‌ನಲ್ಲಿ ಸಂಚರಿಸುವವರು ಮೂಗಿಗೆ ಕೈ ಮುಚ್ಚಿಕೊಂಡೇ ಹೋಗಬೇಕಾದ ಪರಿಸ್ಥಿತಿ.

ಈ ಬಗ್ಗೆ ಬಹಳಷ್ಟು ಮಂದಿ ಜನಪ್ರತಿನಿಧಿ ಗಳ, ಅಧಿಕಾರಿಗಳ ಗಮನ ಸೆಳೆದರೂ ಸಮಸ್ಯೆ ಮಾತ್ರ ಪರಿಹಾರವಾಗಿಲ್ಲ. ಕೋಳಿ ವ್ಯಾಪಾರಸ್ಥರು ಅವರ ಬದುಕಿನ ದಾರಿಯಾಗಿ ಕೋಳಿ ವ್ಯಾಪಾರ ಮಾಡುತ್ತಿರುವುದು ಸರಿ, ಆದರೆ ಅದರ ತ್ಯಾಜ್ಯ ವನ್ನು ನೂರಾರು ಮಂದಿ ಸಂಚರಿಸುವ ರಸ್ತೆ ಬದಿ ಯಲ್ಲಿ ಹಾಕುವುದು ಸರಿಯೇ?

ಇದರಿಂದ ಜನರ ಆರೋಗ್ಯ ಹದಗೆಟ್ಟು ಹೋದರೆ ಅದರ ಹೊಣೆ ವಹಿಸುವವರು ಯಾರು? ಈ ಬಗ್ಗೆ ಕೋಳಿ ವ್ಯಾಪಾರ ಮಾಡುವ ವರು ಕೂಡಾ ಚಿಂತಿಸಬೇಕು. ಈಗಾಗಲೇ ಕೋಳಿ ಗಳ ತ್ಯಾಜ್ಯ ಈ ತೆಂಗಿನ ತೋಟದಲ್ಲಿ ತುಂಬಿರು ವುದರಿಂದ ಪ್ರಯಾಣಿಕರು ಬಹಳ ಸಂಕಷ್ಟದಿಂದ ಪ್ರಯಾಣಿಸಬೇಕಾದ ಅನಿವಾರ್ಯತೆ ಬಂದಿದೆ. ಸಮಸ್ಯೆಗಳಿಗೆ ಪರಿಹಾರ ನಾವು ಕೊಡುತ್ತೇವೆ ಎಂದು ಊರಿಡಿ ಡಂಗುರ ಸಾರುವ ಜನಪ್ರತಿನಿಧಿಗಳು ಈ ಒಂದು ಸಮಸ್ಯೆಗೆ ಶೀಘ್ರ ಪರಿಹಾರ ಯಾಕೆ ಒದ ಗಿಸುವುದಿಲ್ಲ? ಕೋಳಿಗಳ ತ್ಯಾಜ್ಯಗಳನ್ನು ಹಾಕು ವವರ ವಿರುದ್ಧ ಯಾಕೆ ಕ್ರಮ ಕೈಗೊಳ್ಳುವುದಿಲ್ಲ? ಒಟ್ಟಾರೆಯಾಗಿ ಎಲ್ಲರೂ ಮೌನ ಉತ್ತರ ನೀಡು ತ್ತಿರುವುದರಿಂದ ಇಲ್ಲಿನ ಈ ಸಮಸ್ಯೆ ಹಾಗೆಯೇ ಮುಂದುವರಿಯುತ್ತಿದೆ. ಇದರಿಂದ ತೊಂದರೆಗೊ ಳಗಾಗುವುದು ಈ ಊರಿನ ಜನರು. ಇದನ್ನು ಅರ್ಥಮಾಡಿಕೊಂಡು ರಸ್ತೆ ಬದಿಯಲ್ಲಿ ತ್ಯಾಜ್ಯಗ ಳನ್ನು ಹಾಕದಂತೆ ಅಧಿಕಾರಿಗಳು ಸೂಕ್ತ ಕ್ರಮ ಕೈ ಗೊಳ್ಳಬೇಕಾಗಿದೆ.

ಇಲ್ಲದೇ ಹೋದಲ್ಲಿ ಇಲ್ಲಿ ಕೊಳೆತ ತ್ಯಾಜ್ಯ ತುಂಬಿ ಸಾಂಕ್ರಾಮಿಕ ರೋಗ ಹರಡುವ ದಿನ ದೂರವಿಲ್ಲ. ವ್ಯಾಪಾರ ಎಷ್ಟು ಮುಖ್ಯವೋ ಅಷ್ಟೇ ಆರೋಗ್ಯವೂ ಕೂಡ ಮುಖ್ಯ. ಇದನ್ನಾದರೂ ಕೋಳಿ ವ್ಯಾಪಾರ ಮಾಡುವವರು ಅರ್ಥಮಾ ಡಿಕೊಂಡು ವ್ಯಾಪಾರ ಮಾಡಿ ಕೋಳಿ ತ್ಯಾಜ್ಯ ಎಸೆ ಯುವುದನ್ನು ನಿಲ್ಲಿಸಿದರೆ ಜನರಿಗೊಂದು ನೆಮ್ಮದಿ ಸಿಗಬಹುದು.

ಓರ್ವ ನಾಗರಿಕ, ಉರುಮನೆ

ಕರ್ನಾಟಕ ರಾಜ್ಯದಲ್ಲಿ ಸರಕಾರ ಎಂಬು ದು ಇದೆಯೇ? ಕೇಂದ್ರ ಮತ್ತು ರಾಜ್ಯ ಸರಕಾ ರದ ಭ್ರಷ್ಟಾಚಾರ ಗಂಡಾಂತರಕಾರಿಯ ಲ್ಲವೇ? ಚುನಾವಣೆ ಬಂದಾಗ ಮಾತ್ರ ಕಾಂಗ್ರೆಸ್ ಪಕ್ಷ ಗಾಢ ನಿದ್ರೆಯಿಂದ ಏಳುವುದು ಯಾಕಾಗಿ? ರಾಷ್ಟ್ರೀಯ ಪಕ್ಷಗಳನ್ನು ಜನ ಯಾಕೆ ತಿರಸ್ಕರಿ ಸುತ್ತಿದ್ದಾರೆ? ಕರಾವಳಿ ಜಿಲ್ಲೆಯ ಹಲವಾರು ಗಂಭೀರ ಪ್ರಕರಣಗಳಲ್ಲಿ ಕಾಂಗ್ರೆಸ್-ಬಿಜೆಪಿ ಪರಸ್ಪರ ಸಹಕರಿಸುವುದು ಯಾತಕ್ಕಾಗಿ? ಇತರ ಜಿಲ್ಲೆಗಳಂತೆ ಉಡುಪಿ ಜಿಲ್ಲೆಗೆ ರೈಲ್ವೇ ಪ್ರಯಾಣದ ಸೌಲಭ್ಯಗಳು ಈ ವರೆಗೆ ಯಾಕೆ ದೊರಕಿಲ್ಲ? ಇಬ್ಬರು ಮೀನುಗಾರಿಕಾ ಸಚಿವರು ಉಡುಪಿ ಜಿಲ್ಲೆಯ ಉಸ್ತುವಾರಿ ಸಚಿವರಾಗಿದ್ದು, ಶಾಶ್ವತ ತಡೆಗೋಡೆ ಯಾಕೆ ನಿರ್ಮಿಸಿಲ್ಲ. ಕಡ ಲ್ಕೊರೆತದ ಹೆಸರಿನಲ್ಲಿ ಯಾವ್ಯಾವ ತಿಮಿಂಗಿ ಲಗಳು ಎಷ್ಟೆಷ್ಟು ನುಂಗಿ ಹಾಕಿವೆ? ಈ ಹಿಂದಿನ ಕಾಂಗ್ರೆಸ್ ಬಿಜೆಪಿ ಸರಕಾರಗಳು ತಮ್ಮ ಪ್ರಣಾ ಳಿಕೆಗಳಲ್ಲಿ ಹೇಳಿ ದ್ದೇನು? ಮಾಡಿದ್ದೇನು? ಪೆಟ್ರೋಲ್, ಡೀಸೆಲ್, ಗ್ಯಾಸ್ ಬೆಲೆ ಏರಿಸಿ ಜನ ಸಾಮಾನ್ಯರನ್ನು ನಿರ್ಗತಿಕರನ್ನಾಗಿಸುವ ಬದಲು ವಿದೇಶದಲ್ಲಿರುವ ಕಾಳಧನ, ೨ಜಿ ಸ್ಪೆಕ್ಟ್ರಂನ ಲಂಚದ ಹಣ ವಸೂಲಿಗೆ ಕ್ರಮ ಕೈಗೊಂಡು ಈ ಕಂಪೆನಿಗಳ ನಷ್ಟ ಭರಿಸಲು ಕ್ರಮ ಕೈಗೊಳ್ಳ ಬಾರದೇಕೆ? ಜನರಿಗೆ ಯಾವುದೇ ಮೂಲಭೂತ ಸೌಲಭ್ಯ ಒದಗಿಸದೆ ಕಾರ್ಕಳ ಬಸ್ಸು ನಿಲ್ದಾಣ ಅವೈeನಿಕವಾಗಿ ಸ್ಥಳಾಂತರ ಮಾಡಲು ಕಾರ ಣವೇನು? ಈ ಎಲ್ಲಾ ಪ್ರಶ್ನೆಗಳಿಗೆ ಉತ್ತರಿಸುವರೇ?

ಸಚಿನ್ ಹೆಗ್ಡೆ, ಕಾರ್ಕಳ

ಸ್ಥಾಪಿತ ಹಿತಾಸಕ್ತಿಗಳ ಕಪಿಮುಷ್ಠಿಯಲ್ಲಿರುವ ದ.ಕ. ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತಿನ ನಾಯಕತ್ವದ ಬದ ಲಾವಣೆ ಅನಿವಾರ್ಯವಾಗಿದೆ. ಕನ್ನಡವನ್ನು, ಕನ್ನಡ ಸಾಹಿತ್ಯ ಪರಿಷತ್ತನ್ನು, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ದೇಣಿಗೆಯನ್ನು, ಸ್ವಹಿತಕ್ಕಾಗಿ, ಸ್ವಜನಪಕ್ಷಪಾತಕ್ಕಾಗಿ ಬಳ ಸಿಕೊಳ್ಳುವವರನ್ನು ಹಾಗೂ ಲಾಭಕ್ಕಾಗಿ ಅದರ ಹಿಂದೆ ಓಡುವವರನ್ನು ಬದಿಗಿಟ್ಟು ಈ ಬಾರಿಯ ಕಸಾಪ ಚುನಾ ವಣೆಗೆ ಹೊಸ ನಾಯಕರನ್ನು ಆಯ್ಕೆ ಮಾಡಬೇಕು. ಅದಿಲ್ಲ ಎಂದಾದರೆ ಕರ್ನಾಟಕ ರಕ್ಷಣಾ ವೇದಿಕೆಯು ಸಮಾನ ಮನಸ್ಕ ಕನ್ನಡ ಪರ ಸಂಘಟನೆಗಳ ಸಹಯೋ ಗದೊಂದಿಗೆ ತನ್ನದೇ ಅಭ್ಯರ್ಥಿಯನ್ನು ನಿಲ್ಲಿಸಿ ಗೆಲ್ಲಿಸಲು ವೇದಿಕೆಯನ್ನು ಸಿದ್ಧಗೊಳಿಸಿದೆ. ಅದಕ್ಕೆ ನಾಡು ನುಡಿಯ ಬಗ್ಗೆ ಕಾಳಜಿ ಇರುವವರೆಲ್ಲಾ ಕೈಜೋಡಿಸಲಿದ್ದಾರೆ.

ಇತ್ತೀಚಿನ ಕೆಲವೊಂದು ಬೆಳವಣಿಗೆಯಲ್ಲಿ ಹಿರಿಯ ರಾದ ಹರಿಕೃಷ್ಣ ಪುನರೂರುರವರ ನೇತೃತ್ವದಲ್ಲಿ ಬದ ಲಾವಣೆಯ ಚಿಂತನೆ ನಡೆಯುತ್ತಿರುವುದು ಉತ್ತಮ ಬೆಳ ವಣಿಗೆ. ಸಂಘಟಕರೂ, ಸಾಹಿತ್ಯಾಭಿಮಾನಿಯೂ ಆದ ಸರ್ವೋತ್ತಮ ಅಂಚನ್‌ರವರ ಬಗ್ಗೆ ಒಲವು ಮೂಡಿ ಬರುತ್ತಿರುವುದನ್ನು ಕರವೇ ಸ್ವಾಗತಿಸುತ್ತದೆ. ಆದರೆ ಯಾರೇ ಆದರೂ ಸಹ ಮಂಗಳೂರಿಗೊಂದು ಕನ್ನಡ ಭವನ, ಕಸಾಪಕ್ಕೆ ಸ್ವಂತ ಕಚೇರಿ, ಕನ್ನಡಮ್ಮನ ಮನಸ್ಸಿನವರಿಗೆಲ್ಲ ರಿಗೂ ಸದಸ್ಯರಾಗಲು ಮುಕ್ತ ಅವಕಾಶ. ಪ್ರತೀ ವರ್ಷ ಮಹಾಸಭೆ ಹಾಗೂ ಲೆಕ್ಕಪತ್ರ ಮಂಡನೆ. ಪ್ರತೀ ೨೩ ವರ್ಷ ಕ್ಕೊಮ್ಮೆ ಅಧ್ಯಕ್ಷರ ಬದಲಾವಣೆ, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ, ಬ್ಯಾಂಕ್ ಹಾಗೂ ಇನ್ನಿತರರುಗಳಿಂದ ಬಂದ ದೇಣಿಗೆಗಳನ್ನು ನೇರ ಕಸಾಪಕ್ಕೆ ವರ್ಗಾಯಿಸುವುದು. ಕ.ಸಾ. ಪ.ದ ಪ್ರಶಸ್ತಿಗಳನ್ನು ಅಧಿಕಾರಕ್ಕೆ, ಹಣಕ್ಕೆ, ಅಂತಸ್ತಿಗೆ ಶಿಫಾ ರಸ್ಸಿಗೆ ಮಾರಿಕೊಳ್ಳದೆ, ನಾಡುನುಡಿಗಾಗಿ ಹೋರಾಡಿದ ಕನ್ನಡಪರ ಹೋರಾಟಗಾರರಿಗೆ ಹಾಗೂ ಸಂಘಟನೆಗ ಳನ್ನು ಪರಿಗಣಿಸಬೇಕು. ಅವರಿಗೂ ಪ್ರಶಸ್ತಿ ನೀಡಿ ಗೌರವಿಸ ಬೇಕು. ಈ ಎಲ್ಲಾ ಸಮಾಜಪರ, ನಾಡು ನುಡಿಯ ಪರ ಚಿಂತನೆ ಇದ್ದವರನ್ನು ಕರವೇ ಒಪ್ಪಿಕೊಳ್ಳುತ್ತದೆ. ಇಲ್ಲದಿ ದ್ದಲ್ಲಿ ಕರವೇ ಹೋರಾಟದ ಮೂಲಕ ಜನಜಾಗೃತಿ ಮೂಡಿಸಿ ತನ್ನದೇ ಅಭ್ಯರ್ಥಿಯನ್ನು ನಿಲ್ಲಿಸಿ ಗೆಲ್ಲಿಸಲು ತೀರ್ಮಾಸಿದೆ.

ನಝೀರ್ ಹುಸೈನ್, ಪ್ರಧಾನ ಕಾರ್ಯದರ್ಶಿ ಕ.ರ.ವೇ ದ.ಕ

ಹೆಬ್ರಿ ಸಮೀಪದ ಕುಗ್ರಾಮದ ಹುಡುಗಿ ಮಮತಾ ಪೂಜಾರಿ ನೇತೃ ತ್ವದ ಕಬಡ್ಡಿ ತಂಡ ವಿಶ್ವಮಟ್ಟದಲ್ಲಿ ಗೆಲುವು ಸಾಧಿಸಿರುವುದು ಸಂತಸದ ಸಂಗತಿ. ಆದರೆ ಕಬಡ್ಡಿ ಆಟಗಾರರಿಗೆ ಸರಕಾರ ನೀಡುತ್ತಿರುವ ನೀರಸ ಪ್ರೋತ್ಸಾಹ ಕಂಡು ನಿಜಕ್ಕೂ ಬೇಸರವಾಗುತ್ತಿದೆ. ಯಾಕೆಂದರೆ ಕ್ರಿಕೆಟ್ ಮತ್ತಿ ತರ ಕ್ರೀಡೆಯಲ್ಲಿ ಗೆದ್ದವರಿಗೆ ಕೋಟಿ-ಕೋಟಿ ಕೊಡಲಾಗುತ್ತದೆ. ಆದರೆ ಕಬ ಡ್ಡಿಯಂಥ ಗ್ರಾಮೀಣ ಆಟಗಾರರಿಗೆ ಮಾತ್ರ ಪ್ರೋತ್ಸಾಹವಿಲ್ಲ. ಇದು ಮಮತಾ ಪೂಜಾರಿಯಂಥ ಒಂದಿಬ್ಬರು ಕ್ರೀಡಾಳುಗಳ ಸಮಸ್ಯೆಯಲ್ಲ. ಎಲ್ಲ ಗ್ರಾಮೀಣ ಕ್ರೀಡಾಳುಗಳ ಸಮಸ್ಯೆ ಇದೇ ಆಗಿದೆ. ಕಬಡ್ಡಿ ಆಟಕ್ಕೆ ಅಂತರಾಷ್ಟ್ರೀಯ ಮಟ್ಟ ದಲ್ಲಿ ಜನಮನ್ನಣೆ ತಂದುಕೊಟ್ಟ ಮಮತಾರನ್ನು ಸರಕಾರ ಗುರುತಿಸದೇ ಇರುವುದು ಬೇಸರದ ಸಂಗತಿ. ಬೇರೆ ರಾಜ್ಯಗಳ ಕಬಡ್ಡಿ ಆಟಗಾರರಿಗೆ ಕೋಟಿ ಮೊತ್ತವನ್ನು ಬಹುಮಾನವಾಗಿ ನೀಡುವಾಗ ನಮ್ಮಲ್ಲಿ ಕೆಲವೇ ಲಕ್ಷ ಗಳನ್ನು ಕೊಟ್ಟು ಆಟಗಾರರನ್ನು ಸಂತೃಪ್ತಿ ಪಡಿಸುವುದು ಸರಿಯೇ? ರಾಜ್ಯ ಸರಕಾರ ರಾಜಕೀಯ ಸಭೆ-ಸಮಾರಂಭಗಳಿಗೆ ಖರ್ಚು ಮಾಡುವ ಹಣ ವನ್ನು ಇಂಥ ಕ್ರೀಡಾಳುಗಳಿಗೆ ನೀಡಿದಲ್ಲಿ ನಮ್ಮ ದೇಶವೂ ಇತರ ರಾಷ್ಟ್ರಗಳ ಎದುರು ತಲೆಯೆತ್ತಿ ನಿಲ್ಲುವಂತಾದೀತು.

ಶರಣ್, ಕಾರ್ಕಳ

ಈಗ ಬಸ್ಸುಗಳಲ್ಲಿ ಮಹಿಳೆಯರಿಗಾಗಿ ಮೀಸಲಿಟ್ಟ ಸೀಟುಗಳು ಲಭಿಸುತ್ತಿದ್ದರೂ ಬಸ್ಸಿನಲ್ಲಿ ಮಹಿಳೆಯರಿಗೆ ಒಂದು ರೀತಿಯ ಕಿರುಕುಳ ತಪ್ಪಿದ್ದಲ್ಲ. ಯಾಕೆಂದರೆ ಕೆಲ ವೊಂದು ಯುವಕರು ಬಸ್ಸಿನ ಮುಂದಿನ ಬಾಗಿಲಿನಲ್ಲೇ ಹತ್ತಿ ಮಹಿಳೆಯರ ಸೀಟಿನ ಹತ್ತಿರ ಬಂದು ನಿಲ್ಲುತ್ತಾರೆ. ಹಿಂದುಗಡೆ ಬೇಕಾದಷ್ಟು ಜಾಗವಿದ್ದರೂ ಅಲ್ಲಿಯೇ ಬಂದು ನಿಲ್ಲುವುದು ಒಂದು ರೀತಿಯ ಚಟವಾಗಿ ಬೆಳೆದಿದೆ ಎಂದರೆ ತಪ್ಪಾಗಲಾರದು. ಅದಲ್ಲದೆ ಬಸ್ಸಿನ ಬಾಗಿಲಿನಲ್ಲೇ ನಿಂತು ಮಹಿಳೆಯರು ಹತ್ತುವಾಗ ತಮಾಷೆ ಮಾಡುವುದು ವಾಡಿ ಕೆಯಾಗಿದೆ. ಬೆಳಿಗ್ಗಿನ ಹೊತ್ತು ಬಸ್ಸಿನಲ್ಲಿ ರಶ್ ಇರುವಾಗಲೇ ಕೆಲವೊಂದು ಯುವಕರು ಬೇಕುಬೇಕೆಂದೇ ಬಸ್ಸಿನಲ್ಲಿ ಬರುವವರೂ ಇದ್ದಾರೆ. ಕೆಲವೊಂದು ಬಸ್ಸಿನಲ್ಲಿ ಇದನ್ನೆಲ್ಲಾ ಬಸ್ಸಿನ ಕಂಡೆಕ್ಟರ್, ನಿರ್ವಾಹಕ ಗಮನಿಸಿದರೂ ಅಂತಹ ಯುವಕರಿಗೆ ಪೋತ್ಸಾಹ ನೀಡುತ್ತಾರೆ. ರಶ್‌ನಲ್ಲಿ ಮಹಿಳೆಯರ ಹತ್ತಿರ ನಿಂತು ತಮಾಷೆ ಮಾಡುವುದು, ರೇಗಿಸುವುದು ಮಾಡುವವರ ವಿರುದ್ಧ ಸರಿಯಾದ ಕ್ರಮ ತೆಗೆದುಕೊಳ್ಳಬೇಕಾಗಿದೆ.

ನೊಂದ ವಿದ್ಯಾರ್ಥಿನಿ, ಮಂಗಳೂರು

ಬಜ್ಪೆ ಪೊಲೀಸ್ ಠಾಣೆಯ ಹಿಂದಿನ ಎಸ್ಸೈ ಜಾರಿಗೆ ತಂದಿದ್ದ ಮಹತ್ವದ ಯೋಜನೆ ನೋ ಪಾರ್ಕಿಂಗ್ ಪಾಲನೆಯಾಗುವುದು ಮಾತ್ರ ಕಾಣುತ್ತಿಲ್ಲ. ಇಲ್ಲಿನ ರಸ್ತೆಯ ಇಕ್ಕೆಲಗಳಲ್ಲಿ ವಾಹನಗಳು ಬೇಕಾಬಿಟ್ಟಿ ತಂಗುವ ಕಾರಣ ಪಾದಚಾರಿಗಳ ಸಂಚಾರಕ್ಕೆ ಅಡಚಣೆಯಾಗುತ್ತಿತ್ತು. ಈ ನಿಟ್ಟಿನಲ್ಲಿ ನೋ ಪಾರ್ಕಿಂಗ್ ವ್ಯವಸ್ಥೆ ಜನರಿಗೆ ಆಶಾದಾಯಕವಾಗಿತ್ತು. ಆದರೆ ಇತ್ತೀಚಿನ ದಿನ ಗಳಲ್ಲಿ ಇಲ್ಲಿ ವಾಹನಗಳು ಸಾಲಾಗಿ ನಿಂತಿರುವುದು ಕಂಡುಬರುತ್ತದೆ. ಇದನ್ನು ನೋಡಿದರೆ ನೋ ಪಾರ್ಕಿಂಗ್ ಯಾರಿಗೆ ಎನ್ನುವುದೇ ಅರ್ಥವಾಗುವುದಿಲ್ಲ. ನೋ ಪಾರ್ಕಿಂಗ್ ಎಂದು ಬೋರ್ಡ್ ಹಾಕಿರುವಲ್ಲಿಯೂ ಬೈಕ್‌ಗಳು ನಿಂತಿ ರುತ್ತವೆ. ಇದರಿಂದ ಜನರು ಸುಗಮವಾಗಿ ಸಂಚಾರ ನಡೆ ಸಲು ಸಾಧ್ಯವಾಗುತ್ತಿಲ್ಲ. ಸ್ಥಳೀಯ ಗ್ರಾಮ ಪಂಚಾಯತ್, ಪೊಲೀಸ್ ಇಲಾಖೆ ಇತ್ತ ಕಡೆ ಗಮನ ಹರಿಸುವುದು ಒಳ್ಳೆಯದು.

ನಾಗೇಶ್, ಬಜ್ಪೆ

ಇತ್ತೀಚೆಗಷ್ಟೇ ಎಸ್‌ಡಿಪಿಐ ಎಂಬ ನೂತನ ಪಕ್ಷವೊಂದು ತನ್ನ ಸಮಾವೇಶವನ್ನು ಮಂಗಳೂರಿನಲ್ಲಿ ನಡೆಸಿತು. ನಗರದಾದ್ಯಂತ ಬ್ಯಾನರ್, ಬಂಟಿಂಗ್ಸ್, ಮತ್ತು ತನ್ನ ಪಕ್ಷದ ಧ್ವಜ ಗಳನ್ನು ಹಾಕಿ ಅದ್ದೂರಿಯಾಗಿ ಸಮಾವೇಶವನ್ನು ನಡೆಸಲಾಯಿತು. ಆದರೆ ಇದಕ್ಕೆಲ್ಲಾ ಹಣದ ಮೂಲ ಯಾವುದು ಎಂಬ ಬಗ್ಗೆ ನನ್ನಲ್ಲಿ ಸಣ್ಣ ಅನುಮಾನಗಳಿವೆ.

ನಾನು ಯಾವುದೇ ರಾಜಕೀಯ ಪಕ್ಷದ ಕಾರ್ಯಕರ್ತನಲ್ಲ, ಹಿಂಬಾಲ ಕನೂ ಅಲ್ಲ. ಆದರೆ ಸಾಮಾನ್ಯ ನಾಗ ರಿಕನಾಗಿ ಎಸ್‌ಡಿಪಿಐ ಪಕ್ಷದ ಪ್ರಮು ಖರಲ್ಲಿ ನನ್ನದೊಂದು ಸಣ್ಣ ಪ್ರಶ್ನೆ. ಅಂಬೆಗಾಲಿಕ್ಕುತ್ತಾ ಸಾಗುತ್ತಿರುವ ನಿಮ್ಮ ಪಕ್ಷಕ್ಕೆ ಇಷ್ಟು ಹಣ ವ್ಯಯಿಸಿ, ಅದ್ದೂರಿ ಸಮಾವೇಶ ನಡೆಸಲು ಹಣ ಎಲ್ಲಿಂದ ಬಂತು? ಬಿಜೆಪಿ, ಕಾಂಗ್ರೆಸ್‌ನಂತಹ ಪಕ್ಷಗಳಿಗಾದರೆ ಇದು ದೊಡ್ಡ ವಿಚಾ ರವಲ್ಲ. ಆದರೆ ಇನ್ನೂ ಪೂರ್ಣ ಪ್ರಮಾ ಣದಲ್ಲಿ ನೆಲೆಯೂರದ ನಿಮ್ಮ ಪಕ್ಷಕ್ಕೆ ಆದಾಯದ ಮೂಲವೇನು? ನಿಮ್ಮಿಂದ ಕೆಲವೊಂದು ಪ್ರದೇಶಗಳಲ್ಲಿ ಉತ್ತಮ ಕಾರ್ಯಗಳು ನಡೆದಿರುವ ಬಗ್ಗೆ ತಿಳಿ ದುಕೊಂಡಿರುವೆ. ಕೆಟ್ಟ ರಾಜಕೀಯ ಪಕ್ಷಗಳ ಮಧ್ಯೆ ಉತ್ತಮ ನಾಯಕತ್ವದ ಅಗತ್ಯವಿದೆ. ಹೀಗಿರುವಾಗ ನಿಮ್ಮ ಪಕ್ಷ ವನ್ನು ಜನತೆ ಸ್ವೀಕರಿಸುವ ಸಾಧ್ಯತೆ ಯಿದೆ. ಆದರೆ ಈ ರೀತಿ ಅದ್ದೂ ರಿಯ ಸಮಾವೇಶಗಳ ಮೂಲಕ ನಿಮ್ಮ ಶ್ರೀಮಂತಿಕೆಯ ಪ್ರದರ್ಶನ ಕ್ಕಿಳಿದರೆ ಇತರೆ ಪಕ್ಷಗಳಂತೆ ಎಸ್‌ಡಿ ಪಿಐ ಕೂಡ ಜನರ ವಿಶ್ವಾಸ ಕಳೆದು ಕೊಳ್ಳುವುದು ನಿಶ್ಚಿತ.

ಜನಪರ ಹಿತಾಸಕ್ತಿಯ ಪಕ್ಷ ಎಂದು ಹೇಳಿಕೊಳ್ಳುವ ನೀವು ನನ್ನ ಗೊಂದಲವನ್ನು ನಿವಾರಿಸುತ್ತೀರಿ ಎಂದುಕೊಂಡಿರುವೆ.

ವಿನ್ಯಾಸ್, ಮಂಗಳೂರು

ಕಾರ್ಕಳ: ಹಳೆ ಬಸ್ ನಿಲ್ದಾಣ ಸ್ಥಳಾಂತರ ವಿಚಾರವು ಉಪಚುನಾವಣೆಯಲ್ಲಿ ಬ್ರಹ್ಮಾಸ್ತ್ರ ವಿಚಾರವಾಗಿ ಮಾರ್ಪಟ್ಟಿದೆ.

ಜಾತ್ಯತೀತ ಜನತಾದಳವು ಆಯೋಜಿಸಿದ ಸಭೆಯನ್ನು ಉದ್ದೇಶಿಸಿ ಮಾತಾನಾಡಿದ ಮಾಜಿ ಮುಖ್ಯಮಂತ್ರಿ ಕುಮಾರಸ್ವಾಮಿ ಅವರು ಕಾರ್ಕಳದ ಜನತೆಯ ಅನುಕೂಲಕರವಾಗಿದ್ದ ಬಸ್ ನಿಲ್ದಾಣವನ್ನು ಜಿಲ್ಲಾಡಳಿತವು ಏಕಾಏಕಿಯಾಗಿ ಸ್ಥಳಾಂತರ ಮಾಡುವ ಮೂಲಕ ಅನ್ಯಾಯವೆಸಗಿದೆ. ಇದರ ವಿರುದ್ಧ ಹೋರಾಟಕ್ಕೆ ಕರೆ ನೀಡಿದವರನ್ನು ಬಗ್ಗುಬಡಿಸುವ ಪ್ರಯತ್ನಗಳು ನಡೆಯುತ್ತಾ ಇರುವ ದೂರುಗಳು ಗಮನಕ್ಕೆ ಬಂದಿದೆ. ಇದು ಪ್ರಜಾಪ್ರಭುತ್ವದ ಮಾರ್ಗವೇ ಎಂದು ಗುಡುಗಿದರು. ಇವರ ಈ ಮಾತುಗಳು ಕೇಳಿದ ಮಂದಿ ಕುಮಾರಸ್ವಾಮಿಯ ಪರ ಜೈಕಾರ ಹಾಕುವುದರೊಂದಿಗೆ ತಮ್ಮ ಹೋರಾಟಕ್ಕೆ ಜನತಾದಳ ಬೆಂಬಲ ಸೂಚಿಸಿರುವುದನ್ನು ಹರ್ಷ ವ್ಯಕ್ತಪಡಿಸಿರುವುದು ಕಂಡುಬಂತು.

ಧರ್ಮದ ಹೆಸರಿನಲ್ಲಿ ಅಧಿಕಾರ ಗದ್ದುಗೆ ಏರಿದ ಯಡಿಯೂರಪ್ಪ ಧರ್ಮಸ್ಥಳ ಮುಂಜುನಾಥ ಸ್ವಾಮಿಯನ್ನು ಬೀದಿಗೆ ತರಲು ಯತ್ನಿಸಿ ತಾನೇ ಬೀದಿಗೆ ಬಿದ್ದಿದ್ದಾರೆಂದು ವ್ಯಂಗ್ಯವಾಡಿದ ಕುಮಾರಸ್ವಾಮಿ ಕರಾವಳಿಯ ಜನತೆ ಜಾಗೃತವಾಗಬೇಕು. ಧರ್ಮ ಉನ್ಮಾತವನ್ನು ಬೀರುತ್ತಿರುವ ಬಿಜೆಪಿ ಹಿಂದು ರಕ್ಷಕವೆಂದು ಫೋಸ್ ಕೊಡುತ್ತಿದ್ದಾರೆ, ಅಲ್ಪಸಂಖ್ಯಾತರಾಗಿರುವ ಮುಸ್ಲಿಂ ರಕ್ಷಕ ತಾನೆಂದು ಕಾಂಗ್ರೆಸ್ ಫೋಸ್ ಕೊಡುತ್ತಿದೆಯೇ ಹೊರತು ಇತ್ತಂಡವನ್ನು ಬೆಸೆಯುವಂತೆ ಮಾಡದೇ, ಸಂಘರ್ಷ ವಾತಾವರಣ ಹುಟ್ಟು ಹಾಕುವ ಮೂಲಕ ಅಧಿಕಾರದ ಗದ್ದುಗೆ ಏರಲು ಆ ಎರಡು ಪಕ್ಷಗಳು ಮುಂದಾಗುತ್ತಿರುವುದನ್ನು ಗಮನಿಸಬೇಕಾಗಿದೆ ಎಂದರು. ಇದೇ ಕಾರಣದಿಂದಾಗಿ ಕರಾವಳಿ ಜಿಲ್ಲೆಯಲ್ಲಿ ಅಗ್ಗಿಂದಾಗೆ ಕೋಮುಗಲಭೆ ಉಂಟಾಗುತ್ತಿದೆ ಎಂಬ ಅಭಿಪ್ರಾಯವನ್ನು ವ್ಯಕ್ತಪಡಿಸಿದರು. ಜೆಡಿಎಸ್ ಅಭ್ಯರ್ಥಿ ಭೋಜೇಗೌಡ, ಯುವ ಘಟಕದ ರಾಜ್ಯ ಅಧ್ಯಕ್ಷ ಮಹೇಂದ್ರ ಕುಮಾರ್, ಮಾಜಿ ಸಚಿವ ಅಮರನಾಥ ಶೆಟ್ಟಿ, ದ.ಕ ಜಿಲ್ಲಾ ಪಂಚಾಯತ್ ಮಾಜಿ ಅಧ್ಯಕ್ಷೆ ರಾಜಶ್ರೀ, ಮೊದಲಾದವರು ಉಪಸ್ಥಿತರಿದ್ದರು.

ಮಂಗಳೂರು: ಗ್ರಾಮ ಪಂಚಾ ಯತ್ ಅಧ್ಯಕ್ಷ ಹಾಗೂ ಉಪಾಧ್ಯಕ್ಷ ರನ್ನು ನೇರ ಚುನಾವಣೆಯ ಮೂಲಕ ಆಯ್ಕೆ ಮಾಡುವ ಹಾಗೂ ಅವರಿಗೆ ಐದು ವರ್ಷ ಆಡಳಿತ ನಡೆಸಲು ಅವಕಾಶ ಮಾಡಿಕೊಡುವ ಬಗ್ಗೆ ರಾಜ್ಯ ಸರಕಾರ ಚಿಂತನೆ ನಡೆಸಿದೆ.

ರಾಜ್ಯದಲ್ಲಿ ಪಂಚಾಯತ್ ರಾಜ್ ವ್ಯವಸ್ಥೆ ರಾಮಕೃಷ್ಣ ಹೆಗಡೆಯ ಕಾಲದಲ್ಲಿ ಆರಂಭವಾಯಿತು. ಮಂಡಲ ಪಂಚಾಯತ್ ಹಾಗೂ ಜಿಲ್ಲಾ ಪರಿಷತ್ ವ್ಯವಸ್ಥೆ ಜಾರಿಗೆ ತಂದ ಅಂದಿನ ಪಂಚಾಯತ್ ರಾಜ್ ಸಚಿವ ಅಬ್ದುಲ್ ನಜೀರ್ ಸಾಬ್ ಪಂಚಾ ಯತ್ ಆಡಳಿತಕ್ಕೆ ಅದೆಷ್ಟರ ಮಟ್ಟಿಗೆ ಅಧಿಕಾರ ನೀಡಿದ್ದರು ಎಂದರೆ ಶಾಸಕರನ್ನು ಜನರು ಲೆಕ್ಕಕ್ಕೇ ತೆಗೆದುಕೊಳ್ಳುತ್ತಿರಲಿಲ್ಲ. ಶಾಸಕರ ಆವಶ್ಯಕತೆಯೇ ಇಲ್ಲ ಎಂಬಂತಹ ಸ್ಥಿತಿ ರೂಪುಗೊಂಡಿತ್ತು. ಆದರೆ ಮುಂದೆ ಆಡಳಿತ ನಡೆಸಿದವರು ಪಂಚಾಯತ್ ವ್ಯವಸ್ಥೆಯನ್ನೇ ಹಾಳು ಗೆಡವಿದರು. ಒಂದೊಂದೇ ಅಧಿಕಾರ ಮೊಟಕುಗೊಳಿಸುತ್ತ ಬಂದಿದ್ದು, ಈಗಿನ ಸ್ಥಿತಿ ಹೇಗಿದೆ ಎಂದರೆ ಪಂಚಾಯತ್ ಆಡಳಿತ ಸರಕಾರದ ಸಲಹೆ ನೀಡುವ ಸ್ಥಿತಿಯಲ್ಲಿ ಮಾತ್ರ ಉಳಿದಿದೆ.

ಆದರೂ ರಾಜಕೀಯ ನಿಂತಿಲ್ಲ. ಪಂಚಾಯತ್ ಸದಸ್ಯರಾಗಲೇ ಲಕ್ಷ ಲಕ್ಷ ವೆಚ್ಚ ಮಾಡುವ ಪರಿಸ್ಥಿತಿ ಇದೆ. ಇನ್ನು ಅಧ್ಯಕ್ಷರಾಗಬಯಸುವವರು ಹೇಗೆ?

ಪಂಚಾಯತ್ ಅಧ್ಯಕ್ಷರ ಅಧಿಕಾರ ಅವಧಿ ೨೦ತಿಂಗಳುಗಳದ್ದಾಗಿದೆ. ಆದರೆ ಬೇಗ ಬೇಗ ಅಧ್ಯಕ್ಷರಾಗುವ ಆಸೆಗೆ ಬಿದ್ದವರು ರಾಜಕೀಯ ಆಟ ಆಡುತ್ತಿ ದ್ದಾರೆ. ಇದರಿಂದ ಪಂಚಾಯತ್ ಆಡ ಳಿತ ಸ್ವಾರ್ಥ ಸಾಧನೆಯ ಕೂಟದಂ ತಾಗಿದೆ. ಹಾಲಿ ಅಧ್ಯಕ್ಷರ ವಿರುದ್ಧ ಅವಿಶ್ವಾಸ ಗೊತ್ತುವಳಿ ಮಂಡಿಸುವುದು ಸಾಮಾನ್ಯ ಎಂಬಂತಾಗಿದ್ದು ಪಂಚಾ ಯತ್ ವ್ಯವಸ್ಥೆಯನ್ನೇ ಅಣಕಿಸುವಂತೆ ಮಾಡಿದೆ. ಅಧ್ಯಕ್ಷರಾಗ ಬಯಸುವವರು ಹಣ ಖರ್ಚು ಮಾಡುವುದು, ಸದಸ್ಯರನ್ನು ಅಪಹರಿಸುವುದು ನಡೆಯುತ್ತದೆ ಇಂತಹ ಬೆಳವಣಿಗೆ ಹಳ್ಳಿ ರಾಜಕೀಯವನ್ನೇ ರಾಡಿ ಎಬ್ಬಿಸಿದೆ. ಇದೆಕ್ಕೆಲ್ಲ ಕಡಿವಾಣ ಹಾಕಲು ಜನರೇ ನೇರವಾಗಿ ಪಂಚಾಯತ್ ಅಧ್ಯಕ್ಷರನ್ನು ಆಯ್ಕೆ ಮಾಡುವ ಪದ್ದತಿ ಜಾರಿಗೆ ತರಲು ಸರಕಾರ ಚಿಂತಿಸುತ್ತಿದೆ.

ಇಂತಹದ್ದೇ ವ್ಯವಸ್ಥೆ ಆಂದ್ರಪ್ರದೇಶ, ತಮಿಳುನಾಡು ಸೇರಿದಂತೆ ದೇಶದ ನಾಲ್ಕು ರಾಜ್ಯಗಳಲ್ಲಿ ಜಾರಿಯಲ್ಲಿದೆ. ಅಮೆರಿಕದಲ್ಲಿ ದೇಶದ ಅಧ್ಯಕ್ಷರ ಆಯ್ಕೆಯೂ ಹೀಗೆಯೇ ನಡೆಯುತ್ತದೆ.

ಢಾಕಾ: ಬಾಂಗ್ಲಾದೇಶದಲ್ಲಿ ನಡೆಯುತ್ತಿರುವ ಏಶ್ಯಾ ಕಪ್‌ನ ಎರಡನೇ ಅಹರ್ನಿಶಿ ಪಂದ್ಯದಲ್ಲಿ ಇಂದು ಭಾರತ ಹಾಗೂ ಶ್ರೀಲಂಕಾ ನಡುವಿನ ರೋಚಕ ಹಣಾಹಣಿ ನಡೆಯಲಿದೆ. ಸಿಬಿ ತ್ರಿಕೋನ ಸರಣಿಯಲ್ಲಿ ಭಾರತ ಹೊರಬಿದ್ದ ಸೇಡನ್ನು ಇಂದು ಲಂಕಾ ವಿರುದ್ಧ ಸಾಧಿಸುವುದೇ ಎಂಬುದು ಕುತೂಹ ಲಕಾರಿ ಪ್ರಶ್ನೆಯಾಗಿದ್ದರೆ ಅದರ ವಿರುದ್ಧದ ಕೊನೆ ಪಂದ್ಯದಲ್ಲಿ ಭಾರತ ಪ್ರದರ್ಶಿಸಿದ ಅದ್ಭುತ ಫಾರ್ಮ್ ಇಲ್ಲೂ ಮುಂದುವರೆಯಲಿದೆಯೇ ಎಂಬುದು ಇನ್ನೊಂದು ಯಕ್ಷಪ್ರಶ್ನೆ.

ಏಶ್ಯಾದ ಮಣ್ಣಿನಲ್ಲಿ ಅದ್ಭುತ ಫಾರ್ಮ್ ಪ್ರದರ್ಶಿ ಸುವ ಸ್ಫೋಟಕ ವೀರೇಂದ್ರ ಸೆಹ್ವಾಗ್ ಅನುಪಸ್ಥಿತಿ ಭಾರತವನ್ನು ಹೆಚ್ಚಾಗಿ ಕಾಡುವುದರಲ್ಲಿ ಯಾವುದೇ ಅನುಮಾನವಿಲ್ಲ. ಆದರೆ ಸಚಿನ್ ಹಾಗೂ ಗಂಭೀರ್ ತಂಡಕ್ಕೆ ಅಗ್ರಕ್ರಮಾಂಕದಲ್ಲಿ ಆಸರೆಯಾಗಲಿದ್ದಾರೆ. ಅಲ್ಲದೆ ತಂಡದ ಹೊಸ ಉಪಕಪ್ತಾನ ವಿರಾಟ್ ಕೊಹ್ಲಿ ಉತ್ತಮ ಫಾರ್ಮ್‌ನಲ್ಲಿರುವುದು ಉತ್ತಮ ಸಂಗತಿ. ಆದರೆ ರೋಹಿತ್ ಹಾಗೂ ರೈನಾ ಇನ್ನೂ ನಿಖರವಾದ ಫಾರ್ಮ್‌ಗೆ ಮರಳದಿರುವುದು ಚಿಂತೆಯ ಸಂಗತಿಯೇ ಸರಿ. ಸವ್ಯಸಾಚಿ ಆಟಗಾರ ರಾದ ಇರ್ಫಾನ್ ಪಠಾಣ್ ಹಾಗೂ ಯೂಸುಫ್ ತಂಡದಲ್ಲಿದ್ದಾರಾದರೂ ಇಬ್ಬರಲ್ಲಿ ಒಬ್ಬರಿಗೆ ಮಣೆ ಹಾಕುವುದು ಗ್ಯಾರಂಟಿ. ಸ್ಪಿನ್ ವಿಭಾಗದಲ್ಲಿ ಆರ್. ಅಶ್ವಿನ್‌ಗೆ ರವೀದ್ರ ಜಡೇಜಾ ಅಥವಾ ರಾಹುಲ್ ಶರ್ಮಾ ಸಾಥ್ ನೀಡಲಿದ್ದಾರೆ. ವಿನಯ್ ಕುಮಾರ್ ಹಾಗೂ ಪ್ರವೀನ್ ಕುಮಾರ್ ತಂಡದ ವೇಗಿಗಳ ಪಟ್ಟಿಯಲ್ಲಿದ್ದಾರೆ. ಅಲ್ಲದೆ ಎದುರಾಳಿ ಲಂಕಾ ಕೂಡ ಸಿಬಿ ಸರಣಿಯ ಫೈನಲ್‌ಗೆ ಪ್ರವೇಶಿಸಿದ ಆತ್ಮವಿಶ್ವಾಸ ವನ್ನು ಇಲ್ಲಿ ತೋರಿಸುವುದು ಖಂಡಿತ. ನಾಯಕ ಜಯವರ್ಧನೆ ಹಾಗೂ ದಿಲ್ಶಾನ್ ಮೊದಲ ವಿಕೆಟ್‌ಗೆ ನಡೆಸುವ ಜೊತೆಯಾಟವು ತಂಡಕ್ಕೆ ಪ್ರಮುಖ. ಉಪುಲ್ ತರಂಗಾ ಮಧ್ಯಮ ಕ್ರಮಾಂಕದಲ್ಲಿ ಆಡುವ ಸಾಧ್ಯತೆ ಇದೆ. ಅಲ್ಲದೆ ಕುಮಾರ ಸಂಗಾಕ್ಕರ ಹಾಗೂ ಚಾಂದಿಮಾಲ್ ಅದ್ಭುತ ಫಾರ್ಮ್‌ನಲ್ಲಿರುವುದು ಭಾರತಕ್ಕೆ ಚಿಂತೆಯ ವಿಷಯವೇ ಸರಿ. ಆದರೆ ಸ್ಪಿನ್ ವಿಭಾಗದಲ್ಲಿ ಲಕ್ಮಲ್ ಬಹುತೇಕ ಆಡುವ ಸಾಧ್ಯತೆಯಿದೆ. ಇನ್ನು ಮಲಿಂಗಾ ಹಾಗೂ ಕುಲಶೇಕರ ತಂಡದ ಪ್ರಮುಖ ಟ್ರಂಪ್‌ಕಾರ್ಡ್ ಬೌಲರ್‌ಗಳಾ ಗಿದ್ದು, ಇವರಿಗೆ ಮಹರೂಫ್ ಹಾಗೂ ಪಿರೇರಾ ಸಾಥ್ ನೀಡಲಿದ್ದಾರೆ. ಅಲ್ಲದೆ ಉತ್ತಮ ಬ್ಯಾಟಿಂಗ್ ಟ್ರ್ಯಾಕ್ ಹೊಂದಿರುವ ಪಿಚ್‌ನಲ್ಲಿ ಟಾಸ್ ಜಯಿಸುವ ತಂಡ ಮೊದಲು ಬ್ಯಾಟಿಂಗ್ ಮಾಡುವ ಸಾಧ್ಯತೆಯಿದೆ.

ಡರ್ಬನ್: ತನ್ನ ಆಡಳಿತಾವಧಿ ಯಲ್ಲಿ ಅವ್ಯವಹಾರ ನಡೆಸಿದ ಆರೋಪ ಹೊಂದಿರುವ ಕ್ರಿಕೆಟ್ ಸೌತ್ ಆಫ್ರಿಕಾ ಮುಖ್ಯಕಾರ್ಯನಿರ್ವ ಹಣಾಧಿಕಾರಿ ಜೆರಾಲ್ಡ್ ಮಜೊಲಾಗೆ ಸಂಘಟಕರು ಪದವಿಯಿಂದಲೇ ಗೇಟ್‌ಪಾಲ್ ನೀಡುವ ಎಲ್ಲಾ ಸಾಧ್ಯತೆ ಗಳಿವೆ ಎಂದು ಹೇಳಲಾಗಿದೆ.

ಕಳೆದ ನಾಲ್ಕು ತಿಂಗಳಿನಿಂದ ನಡೆ ಯುತ್ತಿದ್ದ ಮಜೊಲಾ ಕೆಟ್ಟ ನಿರ್ವ ಹಣೆಯ ಮೇಲೆ ತನಿಖೆಗೆ ಸಂಬಂಧಿಸಿ ನ್ಯಾಯಾಧೀಶ ಕ್ರಿಸ್ ನಿಕೊಲ್‌ಸನ್ ನೀಡಿರುವ ಋಣಾತ್ಮಕ ಹೇಳಿಕೆಯ ನಂತರ ಸಂಘಟಕರು ಸುಮಾರು ಒಂದು ಗಂಟೆಗಳ ಮಾತುಕತೆ ನಡೆಸಿದ್ದು, ಇಲ್ಲಿ ಪದಚ್ಯುತಿಯ ಬಗ್ಗೆ ನಿರ್ಣಯ ತೆಗೆದುಕೊಳ್ಳಲಾಗಿದೆ ಎಂದು ಮೂಲಗಳು ತಿಳಿಸಿವೆ. ಈ ಎಲ್ಲಾ ವಿಚಾ ರದ ಪೂರ್ಣ ಮಾಹಿತಿಯನ್ನು ಕ್ರೀಡಾ ಸಚಿವ ಫಿಕಿಲೆ ಎಮ್‌ಬಲುಲಾಗೆ ದಕ್ಷಿಣ ಆಫ್ರಿಕಾ ಕ್ರಿಕೆಟ್ ಅಧ್ಯಕ್ಷ ಜೆಕೊಬ್ ಜುಮಾ ನೀಡಿದ್ದಾರೆ.

ಢಾಕಾ: ನಿನ್ನೆ ಇಲ್ಲಿ ನಡೆದಿದ್ದ ಬಾಂಗ್ಲಾ ವಿರುದ್ಧ ನಡೆದ ಏಶ್ಯಾ ಕಪ್‌ನ ಉದ್ಘಾಟನಾ ಪಂದ್ಯದಲ್ಲಿ ನಿಧಾನಗತಿಯ ಓವರ್ ನಡೆಸಿದ್ದಕ್ಕೆ ಪಾಕ್ ತಂಡ ದಂಡ ತೆತ್ತಿದೆ. ನಿಗದಿತ ಗುರಿಗಿಂತ ತಂಡ ಎರಡು ಓವರ್‌ಗಳ ಕೊರತೆಯನ್ನು ಕಂಡ ಹಿನ್ನೆಲೆಯಲ್ಲಿ ಮ್ಯಾಚ್ ರೆಫ್ರಿ ಡೇವಿಡ್ ಬೂನ್ ಈ ದಂಡವನ್ನು ಹಾಕಿದ್ದಾರೆ.

ಈ ಹಿನ್ನೆಲೆಯಲ್ಲಿ ಪಾಕ್ ಕಪ್ತಾನ ಪಂದ್ಯದ ೪೦ ಶೇ. ಹಾಗೂ ಇತರೆ ಆಟಗಾರರು ೨೦ ಶೇ.ದಷ್ಟು ಪಂದದ ಶುಲ್ಕವನ್ನು ದಂಡ ರೂಪದಲ್ಲಿ ಪಾವತಿ ಮಾಡಲಿದ್ದಾರೆ. ಒಂದು ವೇಳೆ ಇದೇ ಪರಿಸ್ಥಿತಿ ಇನ್ನೂ ಮುಂದುವರೆದರೆ ಮಿಸ್ಬಾ ಒಂದು ಪಂದ್ಯದಿಂದ ಖೊಕ್ ಅನುಭವಿಸಲಿದ್ದಾರೆ.

ದೆಹಲಿ: ಕಳೆದ ಮೊಹಾಲಿ ಯಲ್ಲಿ ನಡೆದಿದ್ದ ವಿಶ್ವಕಪ್ ಕೂಟದ ಭಾರತ ಹಾಗೂ ಪಾಕಿ ಸ್ತಾನ ಪಂದ್ಯವು ಫಿಕ್ಸಿಂಗ್ ಆಗಿತ್ತು ಎಂಬ ಮಾಧ್ಯಮ ಆರೋಪದ ಬಗ್ಗೆ ಪ್ರತಿಕ್ರಿಯಿಸಲು ಬಿಸಿಸಿಐ ಉಪಾಧ್ಯಕ್ಷ ರಾಜೀವ್ ಶುಕ್ಲಾ ನಿರಾಕರಿಸಿದ್ದು, ಒಂದು ವೇಳೆ ಆ ಬಗ್ಗೆ ಮಾತನಾಡಿದರೆ ಅದು ತಪ್ಪಾಗಬಹುದು ಎಂದು ಅವರು ತಿಳಿಸಿದ್ದಾರೆ.

ಪತ್ರಿಕೆಗಳು ಏನನ್ನೂ ಬೇಕಾದರೂ ಬರೆಯಬ ಹುದು. ಅಲ್ಲದೆ ಐಸಿಸಿ ಬಳಿಯಿಂದ ನಾವು ಏನನ್ನೂ ಪಡೆದಿಲ್ಲ. ಆದರೆ ಈ ಬಗ್ಗೆ ನಮಗೆ ಐಸಿಸಿ ಅಥವಾ ಯಾವುದೇ ಸಂಸ್ಥೆಯಿಂದ ಮಾಹಿತಿ ಸಿಗುವವರೆಗೂ ಪ್ರತಿಕ್ರಿಯೆ ನೀಡಲು ಹೋಗುವುದಿಲ್ಲ ಎಂದು ಶುಕ್ಲಾ ತಿಳಿಸಿದರು. ಇಂಡೋ-ಪಾಖ್ ನಡುವಿನ ವಿಶ್ವಕಪ್ ಸೆಮೀಸ್ ಫಿಕ್ಸ್ ಆಗಿದ್ದು, ಭಾರತೀಯ ನಟಿಯರು ಕೂಡ ಬುಕ್ಕಿಗಳಿಗೆ ನೆರವು ನೀಡುತ್ತಾರೆ ಎಂದು ದೆಹಲಿ ಮೂಲದ ಬುಕ್ಕಿಯೊಬ್ಬ ನೀಡಿದ ಹೇಳಿಕೆಯನ್ನು 'ಸಂಡೇ ಟೈಮ್ಸ್ ವರದಿ ಮಾಡಿತ್ತು.