You are here: Home / cnews, feature / ವೆನ್ಲಾಕ್ ಆಸ್ಪತ್ರೆಯಲ್ಲಿ ಔಷಧ ಕಳ್ಳ ಸಾಗಣೆ

ವೆನ್ಲಾಕ್ ಆಸ್ಪತ್ರೆಯಲ್ಲಿ ಔಷಧ ಕಳ್ಳ ಸಾಗಣೆ

Posted by JAYAKIRANA Kirana on Tuesday, 24 April 2012 | 1 comments

ಸಿಬ್ಬಂದಿ ತೆರದಿಟ್ಟ ರಹಸ್ಯ
ಮಂಗಳೂರು: ಜಿಲ್ಲಾ ಸರಕಾರಿ ಆಸ್ಪತ್ರೆ ವೆನ್ಲಾಕ್‌ನಲ್ಲಿ ಔಷಧ ಅವ್ಯವಹಾರವೊಂದು ವ್ಯವಸ್ಥಿತವಾಗಿ ನಡೆಯುತ್ತಿರುವುದು ಬೆಳಕಿಗೆ ಬಂದಿದೆ. ಬಡವರಿಗೆ ವಿತರಿಸಲೆಂದು ಬರುವ ಔಷಧಗಳು ಗೋಡಾನ್‌ನಿಂದ ವಿತರಣಾ ವಿಭಾಗಕ್ಕೆ ಬಂದು ಬಳಿಕ ಅಲ್ಲಿಂದ ನೇರವಾಗಿ ಸಿಬ್ಬಂದಿ ಕವಾಟು ಸೇರುತ್ತಿದೆ. ಇದನ್ನು ಸಿಬ್ಬಂದಿ ಅರ್ಧ ಬೆಲೆಗೆ ಮಾರಾಟ ಮಾಡಿ ಜೇಬು ತುಂಬಿಸಿಕೊಳ್ಳುತ್ತಿದ್ದಾರೆ.
ಕಳೆದ ಕೆಲ ಸಮಯದಿಂದ ಈ ಕಳ್ಳ ವ್ಯವಹಾರ ನಡೆಯುತ್ತಿದ್ದು ಇತ್ತಿಚೆಗೆ ಸಿಬ್ಬಂದಿ ನಡುವೆ ಹುಟ್ಟಿಕೊಂಡ ಆಂತರಿಕ ಕಚ್ಚಾಟದಿಂದಾಗಿ ಈ ವಿಚಾರ ಬಹಿರಂಗಗೊಂಡಿದೆ.
ರೋಗಿಗಳ ಹೆಸರಿನಲ್ಲಿ, ರೋಗಿಗಳ ನಕಲಿ ಹೆಸರಿನಲ್ಲಿ, ಒಪಿಗೆ ವಿತರಣೆ ಎಂದೆಲ್ಲ ದಾಖಲೆಗಳನ್ನು ಬರೆದು ಔಷಧ ಪಡೆಯುತ್ತಿರುವ ಸಿಬ್ಬಂದಿ ಅದನ್ನು ಆಸ್ಪತ್ರೆ ಹೊರಗೆ ಅರ್ಧ ರೇಟಿಗೆ ಮಾರಾಟ ಮಾಡುತ್ತಿದ್ದಾರೆ. ಈ ದಂಧೆಯಲ್ಲಿ ಆಸ್ಪತ್ರೆಯ ಕೆಲ ನರ್ಸ್‌ಗಳೂ ಶಾಮೀಲಾಗಿದ್ದಾರೆ ಎಂದು ತಿಳಿದು ಬಂದಿದೆ.
ಈ ನಡುವೆ ಅವಧಿ ಮುಕ್ತಾಯವಾದ ಔಷಧವನ್ನು ಆಸ್ಪತ್ರೆ ಆವರಣದ ಹೊರ ಭಾಗದಲ್ಲಿ ಸುಡುವ ಪ್ರಯತ್ನ ನಡೆಸಿದಾಗ ಸಿಕ್ಕಿ ಬಿದ್ದ ಔಷಧ ಉಗ್ರಾಣದ ಸಿಬ್ಬಂದಿಯೊಬ್ಬರು ಬಳಿಕ ಅದನ್ನು ತನ್ನ ಮನೆಗೆ ಸಾಗಿಸಿ ಅಲ್ಲಿ ಈ ಔಷಧಗಳಿಗೆ ಇತಿಶ್ರೀ ಹಾಡುತ್ತಿದ್ದಾರೆಂದು ತಿಳಿದು ಬಂದಿದೆ.
ಸರಕಾರಿ ಆಸ್ಪತ್ರೆಗೆ ಅಗತ್ಯವಿರುವ ಔಷಧಗಳು ಆಸ್ಪತ್ರೆಯ ಬೇಡಿಕೆಯನ್ನು ಆಧರಿಸಿ ಸರಕಾರದಿಂದ ಪೂರೈಕೆಯಾಗುತ್ತಿದೆ. ಆದರೆ ಇಲ್ಲಿನ ಸಿಬ್ಬಂದಿ ಅಗತ್ಯಕ್ಕಿಂತ ಹೆಚ್ಚಿನ ಔಷಧಗಳನ್ನು ತರಿಸಿಕೊಳ್ಳುತ್ತಿದ್ದಾರೆನ್ನಲಾಗಿದೆ. ಸರಕಾರದಿಂದ ಆಸ್ಪತ್ರೆಯ ಔಷಧ ಉಗ್ರಾಣಕ್ಕೆ ಸ್ಟಾಕ್ ಬರುತ್ತಿದ್ದು ಅಲ್ಲಿ ಔಷಧ ಇಂಡೆಕ್ಸ್‌ನಲ್ಲಿ ನಮೂದುಗೊಂಡ ಬಳಿಕ ವಿತರಣಾ ವಿಭಾಗಕ್ಕೆ ದಾಸ್ತಾನುಗೊಳ್ಳುತ್ತದೆ. ಇಲ್ಲಿಂದ ಔಷಧ ವಿತರಣಾ ಕೊಠಡಿ (ಒಪಿ)ಗೆ ಮತ್ತು ಆಸ್ಪತ್ರೆಯಲ್ಲಿ ದಾಖಲಾಗಿರುವ ರೋಗಿಗಳಿಗೆ ವೈದ್ಯರು ಸೂಚಿಸಿದ ಔಷಧವನ್ನು ನೀಡಲಾಗುತ್ತದೆ. ಆದರೆ ಅವ್ಯವಹಾರದ ಕೊಂಡಿ ಆರಂಭವಾಗುವುದು ಇಲ್ಲಿಂದಲೇ. ಒಂದು ಕಡೆ ದಾಖಲಾಗದ ರೋಗಿಗಳ ಹೆಸರಿನಲ್ಲಿ ಔಷಧಗಳು ಡೆಲಿವರಿ ಆಗುತ್ತದೆ. ಇನ್ನೊಂದು ಕಡೆ ರೋಗಿಗೆ ಅಗತ್ಯ ಇಲ್ಲದೆ ಇರುವ ಔಷಧವನ್ನು ಅಗತ್ಯ ಇದೆ ಎಂದು ನಿರೂಪಿಸಿ ಸಿಬ್ಬಂದಿಯೇ ಔಷಧವನ್ನು ಪಡೆದುಕೊಳ್ಳುತ್ತಿದ್ದಾರೆ. ಹೀಗೆ ಪಡೆದ ಔಷಧಗಳು ಹೊರಗಡೆ ಅರ್ಧ ಬೆಲೆಗೆ ಮಾರಾಟವಾಗುತ್ತಿದೆ. ಸರಕಾರದಿಂದ ವಿತರಣೆಯಾಗುವ ಔಷಧದ ಪ್ಯಾಕ್ ಮೇಲೆ ‘ಮಾರಾಟಕ್ಕಲ್ಲ ಎಂಬ ಸೀಲ್ ಇರಬೇಕಾಗುತ್ತದೆ ಆದರೆ ದುಬಾರಿ ಔಷಧಗಳ ಮೇಲೆ ಈ ಸೀಲ್ ಇರುವುದಿಲ್ಲ ಇದು ಸಿಬ್ಬಂದಿಗೆ ವರದಾನವಾಗಿ ಪರಿಣಮಿಸಿದೆ. ಹೀಗಾಗಿ ಔಷಧ ಕಳ್ಳ ಸಾಗಾಣಿಕೆಯಾಗುತ್ತಿದೆ ಬೆಲೆ ಬಾಳುವ ಔಷಧಗಳನ್ನು ಮುಂಚಿತವಾಗಿಯೇ ತೆಗೆದಿಡುವ ಸಿಬ್ಬಂದಿ ಅಗತ್ಯ ಇರುವವರನ್ನು ಸೆಟಿಂಗ್ ಮಾಡಿಕೊಂಡು ಅವರಿಗೆ ಅರ್ಧ ಬೆಲೆಗೆ ಈ ಔಷಧವನ್ನು ಮಾರಾಟ ಮಾಡುತ್ತಿದ್ದಾರೆ. ಕೆಲವೊಮ್ಮೆ ಈ ಔಷಧಗಳು ಮಾರಾಟವಾಗದೇ ಉಳಿಯುತ್ತಿದ್ದು ಅಂತಹ ಸಂದರ್ಭ ಬಂದರೆ ಅದನ್ನು ಮತ್ತೆ ಔಷಧ ಕೊಠಡಿಯಲ್ಲಿ ಇಡಲು ಸಾಧ್ಯಗುವುದಿಲ್ಲ ಯಾಕೆಂದರೆ ಇಂಡೆಕ್ಸ್‌ನಲ್ಲಿ ಈ ಔಷಧ ಡೆಲಿವರಿಡ್ ಎಂದು ದಾಖಲಾಗಿರುತ್ತದೆ. ಈ ಕಾರಣ ಇವುಗಳಿಗೆ ಬೆಂಕಿ ಹಚ್ಚುತ್ತಾರೆ ಎನ್ನುವುದನ್ನು ಸಿಬ್ಬಂದಿಯೇ ಬಹಿರಂಗ ಪಡಿಸಿದ್ದಾರೆ. ಇಲ್ಲಿನ ಕೆಲ ಸಿಬ್ಬಂದಿ ಜೊತೆ ಅವರ ಸ್ನೇಹಿತರೇ ಭಾಗಿಗಳಾಗಿದ್ದಾರೆ. ಈ ಕಳ್ಳ ವ್ಯವಹಾರ ಔಷಧ ಉಗ್ರಾಣದ ಸಮೀಪವೇ ನಡೆಯುತ್ತಿದ್ದರೂ ಯಾರ ಗಮನಕ್ಕೂ ಬರುತ್ತಿಲ್ಲ. ಒಪಿಯಲ್ಲಿ ಸ್ಟಾಕ್ ಇಲ್ಲ ಎನ್ನುವ ಔಷಧಗಳು ಅರ್ಧ ಬೆಲೆಗೆ ಉಗ್ರಾಣದ ಹೊರಗೆ ಸಿಗುತ್ತದೆ.
ಇಷ್ಟೆಲ್ಲ ಅಲ್ಲದೆ ವೆನ್ಲಾಕ್ ಆಸ್ಪತ್ರೆಯ ಔಷಧ ಉಗ್ರಾಣ, ಒಪಿ ಇವೆಲ್ಲ ತೆರೆಯುವುದು ಪ್ರತಿದಿನಾ ಅರ್ಧ ತಾಸು ವಿಳಂಬವಾಗಿಯೇ ರೋಗಿಗಳು ಅಗತ್ಯದ ಔಷಧಿಗಾಗಿ ಸಿಬ್ಬಂದಿಯನ್ನು ತಾಸುಗಟ್ಟಲೇ ಕಾಯುವ ಅನಿವಾರ್ಯತೆಯೀ ಇಲ್ಲಿದೆ. ಊಟಕ್ಕೆಂದು ಹೋಗುವ ಸಿಬ್ಬಂದಿ ಮೊಬೈಲ್‌ನಲ್ಲಿ ಕಾಲಹರಣ ಮಾಡುತ್ತಿರುವುದು ಕಂಡು ಬಂದಿದೆ.
ವೆನ್ಲಾಕ್‌ನಲ್ಲಿ ಇಷ್ಟೆಲ್ಲ ಅವ್ಯವಹಾರ ನಡೆಯುತ್ತಿದ್ದರೂ ಇಲ್ಲಿನ ಆರ್‌ಎಂಒ ಮಾತ್ರ ಜಾಣ ಕುರುಡು ಪ್ರದರ್ಶಿಸುತ್ತಿರುವುದು ಶಂಕೆಗೆ ಕಾರಣವಾಗಿದೆ.